اسلام آباد میں ہائی الرٹ جاری

اسلام آباد: بارڈر ہیلتھ سروسز نے نیپاہ وائرس کے ممکنہ خدشے کے پیشِ نظر مختلف متعلقہ اداروں کو الرٹ جاری کر دیا ہے، تاہم حکام کا کہنا ہے کہ پاکستان میں اس وائرس کا خطرہ فی الحال کم ہے اور تمام اقدامات محض احتیاطی بنیادوں پر کیے جا رہے ہیں۔

حکام کے مطابق اسپتالوں کو ہدایت دی گئی ہے کہ مشتبہ نیپاہ وائرس کے مریضوں کے لیے مخصوص بیڈز مختص کیے جائیں، جبکہ پمز اسپتال کو اسلام آباد ایئرپورٹ سے آنے والے کسی بھی مشتبہ کیس سے نمٹنے کے لیے مکمل طور پر تیار رہنے کا حکم دیا گیا ہے۔ مزید بتایا گیا ہے کہ ہوائی، بحری اور زمینی داخلی راستوں پر نیپاہ وائرس کی اسکریننگ اور نگرانی کے عمل کو مزید سخت کر دیا گیا ہے، جبکہ تمام ایئرپورٹس اور بارڈر پوائنٹس پر فوکل پرسنز بھی نامزد کرنے کی ہدایت جاری کی گئی ہے۔

حکام کے مطابق تمام صوبائی حکومتوں کو نیپاہ وائرس سے نمٹنے کے لیے تربیت یافتہ عملہ اور مؤثر ریفرل سسٹم یقینی بنانے کا کہا گیا ہے۔ اس کے علاوہ ڈی ایچ او اسلام آباد کو مشتبہ نیپاہ مریضوں کے لیے خصوصی ایمبولینس مختص کرنے اور ایسے مریضوں کے قریبی رابطوں کی 21 دن تک مسلسل نگرانی کرنے کی ہدایت بھی جاری کی گئی ہے۔