لاہور: وزیرِ اعلیٰ پنجاب مریم نواز شریف نے رمضان المبارک کے دوران عوام کے لیے 47 ارب روپے کے سب سے بڑے “رمضان نگہبان پیکیج” کی حتمی منظوری دے دی ہے، جس سے تقریباً ایک کروڑ افراد مستفید ہوں گے۔ اس پیکیج کا مقصد مقدس مہینے میں مہنگائی کے بوجھ کو کم کرنا ہے۔
پنجاب کے 42 لاکھ مستحق خاندانوں کو فی خاندان 10,000 روپے فراہم کیے جائیں گے، جبکہ راشن کارڈ ہولڈرز کے لیے ماہانہ امداد 3,000 روپے سے بڑھا کر 10,000 روپے کر دی گئی ہے۔ حکومت 20 لاکھ سے زائد ‘نگہبان کارڈز’ جاری کرے گی، جن کے ذریعے نقد رقم نکلوانا اور اشیائے ضروریہ خریدنا ممکن ہوگا۔ مستحقین یہ رقم بینک آف پنجاب کے برانچ لیس بینکنگ ایجنٹس یا ون لنک نیٹ ورک سے منسلک کسی بھی ATM سے وصول کر سکیں گے۔ کارڈز کی فعال سازی کے لیے صوبے میں 136 مراکز قائم کیے جائیں گے، جبکہ ضلعی انتظامیہ گھر گھر جا کر کارڈز پہنچائے گی تاکہ عوام کو طویل قطاروں میں انتظار نہ کرنا پڑے۔
مزید براں، ہر تحصیل میں 8 “نگہبان دسترخوان” قائم کیے جائیں گے جہاں روزانہ 2,000 افراد باعزت طریقے سے افطاری کر سکیں گے۔ صوبے کے 30 اضلاع میں 65 سہولت بازار اور دیگر مقامات پر عارضی بازار بھی لگائے جائیں گے۔ پیکیج کی شفافیت اور مؤثر عملدرآمد کے لیے ایک “رمضان نگہبان ڈیش بورڈ” بنایا گیا ہے، جہاں حکام کارڈ ہولڈرز کو کال کر کے امداد کی وصولی کی تصدیق کریں گے۔ وزیرِ اعلیٰ نے کہا کہ رمضان میں کوئی مستحق خاندان خود کو تنہا محسوس نہ کرے، ہم غریب عوام کے دکھ سکھ میں ان کے ساتھ کھڑے ہیں۔
تازہ ترین خبروں کے لیے پی این آئی کا فیس بک پیج فالو کریں
