راولپنڈی میں ہائی الرٹ، دفعہ 144 میں توسیع، سیکیورٹی سخت

راولپنڈی میں سیکیورٹی صورتحال کے پیش نظر انتظامیہ نے شہر بھر میں دفعہ 144 کے نفاذ میں 6 فروری تک توسیع کر دی ہے، جبکہ کسی بھی ناخوشگوار واقعے سے نمٹنے کے لیے ہائی الرٹ جاری کر دیا گیا ہے۔

ضلعی انتظامیہ کے مطابق امن و امان برقرار رکھنے کے لیے سیکیورٹی کے غیر معمولی انتظامات کیے گئے ہیں اور حساس مقامات پر نگرانی مزید سخت کر دی گئی ہے۔ دوسری جانب آج بانی پاکستان تحریک انصاف اور بشریٰ بی بی سے اڈیالہ جیل میں ملاقات کا دن ہے۔ پی ٹی آئی کی جانب سے رہنماؤں اور وکلا کی فہرست ایک روز قبل ہی جیل انتظامیہ کو فراہم کر دی گئی تھی۔

ذرائع کے مطابق پارٹی چیئرمین بیرسٹر گوہر اور سیکرٹری جنرل سلمان اکرم راجہ آج اڈیالہ جیل پہنچیں گے، جبکہ ملاقات کی فہرست میں عارف حسین تیتلا، فیصل ملک، حسین مرتضیٰ سنبل اور نعیم حیدر پنجوتھہ کے نام بھی شامل ہیں۔ اس کے علاوہ بانی پی ٹی آئی کی بہنیں اور بشریٰ بی بی کے اہلِ خانہ کے افراد بھی ملاقات کے لیے جیل آئیں گے۔ ممکنہ سیکیورٹی خدشات کے پیش نظر اڈیالہ جیل اور اس کے گردونواح میں پولیس اور قانون نافذ کرنے والے اداروں کی اضافی نفری تعینات کر دی گئی ہے۔