وزیر دفاع خواجہ آصف نے قومی اسمبلی میں خطاب کرتے ہوئے کہا کہ پاکستان کے استحکام کے لیے اب اہم اور فوری فیصلے کرنا ہوں گے۔
انہوں نے کہا کہ ماضی میں ایوب خان، ضیاء الحق اور پرویز مشرف کے دور میں لوکل باڈی کے انتخابات کرائے گئے، لیکن آج ہم لوکل گورنمنٹ کے انتخابات سے گریز کرتے ہیں اور الیکشن شیڈول آنے پر بھی مختلف بہانے بنائے جاتے ہیں۔ خواجہ آصف نے واضح کیا کہ ملک اور نظام کی بقا کے لیے لوکل گورنمنٹ کو مضبوط کرنا ناگزیر ہے۔ انہوں نے مثال دیتے ہوئے کہا کہ چین کے موجودہ صدر بھی ایک سیاسی عمل کے ذریعے ابھرے، اور لیڈرشپ اسی طریقے سے جنم لیتی ہے۔
انہوں نے کراچی میں حالیہ آگ لگنے کے واقعے کا ذکر کرتے ہوئے کہا کہ یہ ہمارے نظام کی کمزوری اور تباہی کی نشانی ہے، اور ملک میں عوام کو بااختیار بنانے کے لیے مضبوط لوکل گورنمنٹ کا قیام ضروری ہے۔ وزیر دفاع نے زور دیا کہ ملک میں یکساں نظامِ تعلیم اور مضبوط لوکل گورنمنٹ سسٹم ہونا چاہیے تاکہ نئی نسل کو پہچانا جا سکے اور قوم کے طور پر ہم متحد رہیں۔
انہوں نے کہا کہ ایسا نظام بنانا ہوگا جس میں اختیارات وفاق سے صوبے، صوبے سے تحصیل اور وارڈ کی سطح تک منتقل ہوں۔ اور خبردار کیا کہ اگر یہی صورتحال رہی تو آخر میں وزارت دفاع کی فائر بریگیڈ ہی آگ بجھانے کے لیے آئے گی۔
تازہ ترین خبروں کے لیے پی این آئی کا فیس بک پیج فالو کریں
