سندھ حکومت نے گل پلازا میں آگ کے حادثے میں جاں بحق ہونے والے افراد کے لواحقین کو ایک کروڑ روپے کی امداد دینے کا اعلان کیا ہے۔ امدادی رقم کی تقسیم کا عمل کل سے شروع ہوگا۔
وزیر اعلیٰ سندھ، سید مراد علی شاہ نے میڈیا سے گفتگو میں کہا کہ گل پلازا کی آگ ایک سنگین واقعہ ہے اور فائر فائٹرز و ریسکیو ٹیمیں تین مختلف راستوں سے اندر جانے کی کوشش کر رہی ہیں۔ انہوں نے بتایا کہ اب تک جاں بحق افراد کی تعداد 15 ہوگئی ہے اور 65 افراد لاپتہ ہیں، جنہیں تلاش کرنے کی بھرپور کوشش کی جا رہی ہے۔ انہوں نے مزید کہا کہ اس واقعے کی تحقیقات کے لیے کمشنر کراچی کی سربراہی میں کمیٹی تشکیل دی جائے گی، اور لاہور کی فرانزک لیب کی مدد بھی لی جائے گی۔ تحقیقات میں جو بھی غلطی سامنے آئے گی، ذمہ داروں کو سزا دی جائے گی۔
وزیر اعلیٰ نے یاد دلایا کہ 2024 میں کراچی کی 145 عمارتوں کا فائر آڈٹ کیا گیا تھا۔ کراچی کے گل پلازا میں آگ کو 33 گھنٹے بعد مکمل طور پر بجھا دیا گیا، اور جلی ہوئی عمارت سے مزید 5 لاشیں نکالی گئی ہیں۔ فی الحال 22 زخمی زیرِ علاج ہیں۔ چیف فائر افسر کے مطابق کولنگ کا عمل جاری ہے، کھڑکیوں کو کٹر سے کاٹا جا رہا ہے اور ہتھوڑوں سے دیواریں گرائی جا رہی ہیں۔ پلازا کی تیسری منزل پر پھنسے افراد کی موجودگی کے امکان کے پیش نظر ریسکیو ٹیم نے اتوار کی رات عمارت کے اندر داخل ہو کر بچاؤ آپریشن کیا۔
تازہ ترین خبروں کے لیے پی این آئی کا فیس بک پیج فالو کریں
