سابق وفاقی وزیرِ اطلاعات اور سینئر سیاستدان فواد چوہدری نے حکمران جماعت مسلم لیگ (ن) کے صدر نواز شریف سے ملک میں سیاسی کشیدگی کم کرنے کے لیے فعال کردار ادا کرنے کی اپیل کی ہے۔
جیو نیوز سے گفتگو کرتے ہوئے فواد چوہدری کا کہنا تھا کہ موجودہ سیاسی صورتحال میں مفاہمت کی اشد ضرورت ہے، اور اس حوالے سے نواز شریف اہم کردار ادا کرسکتے ہیں۔ انہوں نے بتایا کہ نیشنل ڈائیلاگ کمیٹی کی جانب سے وزیراعظم شہباز شریف کو ملاقات کی درخواست دی گئی تھی، تاہم تاحال اس کا کوئی جواب موصول نہیں ہوا۔ فواد چوہدری کے مطابق ملک میں سیاسی استحکام کے لیے نواز شریف، وزیراعظم شہباز شریف اور سابق صدر آصف علی زرداری کو مذاکرات کی میز پر آنا ہوگا۔ انہوں نے کہا کہ کوٹ لکھپت جیل میں قید سیاسی اسیران کی رہائی ایک مثبت پیغام دے سکتی ہے۔
انہوں نے پی ٹی آئی کی حکمتِ عملی پر بھی سوال اٹھاتے ہوئے کہا کہ پارٹی کی پالیسی واضح نہیں، آدھی قیادت انقلاب کی بات کرتی ہے جبکہ آدھی مذاکرات کی حامی ہے۔ ان کا کہنا تھا کہ بیرسٹر گوہر کے بیانات کچھ اور ہوتے ہیں جبکہ خیبر پختونخوا میں جونیئر وزیر مختلف مؤقف اپناتے ہیں۔ فواد چوہدری نے مزید کہا کہ سلمان اکرم راجا افغانستان سے دہشت گردی کے حوالے سے ایک مؤقف رکھتے ہیں، تاہم وزیراعلیٰ سہیل آفریدی اس بیان سے اتفاق نہیں کرتے، جو پارٹی کے اندر پالیسی تضاد کو ظاہر کرتا ہے۔
تازہ ترین خبروں کے لیے پی این آئی کا فیس بک پیج فالو کریں
