اشیائے ضروریہ کی قیمتیں بڑھ گئی، عوام پریشان

ملک میں مہنگائی میں مسلسل دوسرے ہفتے اضافہ دیکھا گیا ہے۔ ادارہ شماریات کی رپورٹ کے مطابق، ہفتہ وار بنیاد پر مہنگائی میں 0.25 فیصد اضافہ ہوا ہے، جس کے بعد مجموعی ہفتہ وار مہنگائی کی شرح 3.87 فیصد تک پہنچ گئی ہے۔

رپورٹ کے مطابق گزشتہ ہفتے 13 اشیائے ضروریہ مہنگی ہوئیں، جبکہ 13 اشیاکی قیمتوں میں کمی ریکارڈ کی گئی۔ 24 اشیاء کی قیمتوں میں استحکام رہا۔ مہنگی ہونے والی اشیا میں ٹماٹر کی قیمت میں 27.64 فیصد، گندم کے آٹے میں 3.26 فیصد، اور انڈوں کی قیمت میں 2.19 فیصد اضافہ ہوا۔ سرخ مرچ، دال مونگ، خشک دودھ اور لکڑی بھی مہنگی ہونے والی اشیا میں شامل رہیں۔

دوسری جانب ٹماٹر 6.72 فیصد، پیاز 3.82 فیصد اور چکن 1.66 فیصد سستے ہوئے۔ نمک، دال چنا، چاول، گھی اور دال مسور کی قیمتوں میں بھی معمولی کمی دیکھی گئی۔

سالانہ بنیادوں پر گندم کے آٹے کی قیمت میں 35 فیصد اور انڈوں کی قیمت میں 21 فیصد تک اضافہ ہو چکا ہے۔ ایک ہفتے کے دوران ایل پی جی سلنڈر کی قیمت میں 7 فیصد اضافہ ریکارڈ کیا گیا۔ چینی کی قیمتیں گزشتہ سال کی نسبت 10.43 فیصد زیادہ ہیں، جبکہ بیف، مرچ، گڑ، لکڑی اور کپڑے بھی سالانہ بنیاد پر مہنگے ہوئے ہیں۔ ایک سال کے دوران گیس چارجز میں 30 فیصد تک اضافہ دیکھا گیا ہے۔