راولپنڈی راولپنڈی میں سیکیورٹی ہائی الرٹ کر دی گئی ہے جبکہ اڈیالہ جیل اور اس کے اطراف میں دفعہ 144 نافذ کر کے سخت حفاظتی انتظامات کیے گئے ہیں۔ دایگل اور گورکھپور ناکوں پر پولیس کی بھاری نفری تعینات کر دی گئی ہے۔
آج منگل کو اڈیالہ جیل میں بانی پی ٹی آئی سے ملاقات کا دن ہے۔ ملاقات کے لیے سلمان اکرم راجہ، بیرسٹر گوہر سمیت 6 رہنماؤں کی فہرست گزشتہ روز جیل حکام کو ارسال کی گئی تھی۔ اس کے علاوہ بانی پی ٹی آئی کی بہنیں بھی آج ملاقات کے لیے جیل پہنچیں گی۔ دوسری جانب 26 نومبر کے احتجاج سے متعلق مقدمہ آخری مراحل میں داخل ہو چکا ہے۔ راولپنڈی کی انسداد دہشت گردی کی خصوصی عدالت میں علیمہ خانم سمیت 11 ملزمان کے خلاف تھانہ صادق آباد کے مقدمے کی سماعت آج ہوگی۔ کیس کی سماعت انسداد دہشت گردی عدالت کے جج امجد علی شاہ کریں گے۔
مقدمے میں شامل 11 ملزمان میں سے 8 ملزمان کے خلاف استغاثہ کے 18 گواہان پر دونوں جانب سے جرح مکمل ہو چکی ہے۔ آج علیمہ خانم اور شریک ملزم عاطف ریاض کے وکلا عدالت میں پیش ہوں گے اور 10 گواہان پر جرح مکمل کی جائے گی۔ واضح رہے کہ گزشتہ سماعت پر وکلا کی عدم پیشی پر عدالت نے وارننگ جاری کی تھی۔ عدالتی احکامات کے مطابق آج ہر صورت جرح مکمل کرنا لازم ہے، بصورت دیگر اسٹیٹ کونسل مقرر کیے جانے کا امکان ہے۔سینئر پراسیکیوٹر ظہیر شاہ پر مشتمل پراسیکیوشن ٹیم بھی عدالت میں پیش ہوگی، جبکہ دیگر آٹھ ملزمان کی حد تک گواہان پر جرح پہلے ہی مکمل کی جا چکی ہے۔
تازہ ترین خبروں کے لیے پی این آئی کا فیس بک پیج فالو کریں
