اپنا گھر بنانے والوں کے لیے خوشخبری

اسلام آباد : ملک بھر کے بلڈرز، ڈیولپرز اور ذاتی گھر تعمیر کرنے کے خواہشمند افراد کے لیے خوش آئند خبر سامنے آ گئی ہے۔

تعمیراتی شعبے کی بنیادی ضرورت سمجھی جانے والی سیمنٹ کی قیمتوں میں کمی ریکارڈ کی گئی ہے، جس سے گھروں کی تعمیر کے اخراجات میں وقتی ریلیف متوقع ہے۔ پاکستان بیورو آف اسٹیٹسٹکس کے مطابق گزشتہ ہفتے کے دوران ریٹیل سطح پر سیمنٹ کی قیمتوں میں واضح کمی دیکھی گئی، خاص طور پر شمالی شہروں میں فروخت بڑھنے کے باعث قیمتیں نیچے آئیں۔ رپورٹ کے مطابق شمالی علاقوں میں سیمنٹ کی ایک بوری کی اوسط خوردہ قیمت 1391 روپے سے کم ہو کر 1387 روپے ہو گئی ہے۔

دوسری جانب جنوبی شہروں میں سیمنٹ کی قیمتیں فی الحال مستحکم رہیں، جہاں اوسط خوردہ قیمت 1446 روپے پر برقرار ہے۔ ماہرین کے مطابق قیمتوں میں یہ معمولی اتار چڑھاؤ تعمیراتی سرگرمیوں، نجی گھر بنانے والوں اور رئیل اسٹیٹ ڈویلپرز کے فیصلوں پر فوری اثر ڈال سکتا ہے۔ اعداد و شمار کے مطابق گزشتہ ماہ سیمنٹ کی مجموعی ترسیل میں معمولی اضافہ ہوا اور یہ 4.347 ملین ٹن تک پہنچ گئی، جو 1.47 فیصد اضافے کو ظاہر کرتی ہے۔ ملکی فروخت میں 6.42 فیصد اضافہ ہو کر 3.725 ملین ٹن رہی، تاہم برآمدات میں نمایاں کمی دیکھی گئی اور یہ 20.66 فیصد گھٹ کر 6 لاکھ 21 ہزار 685 ٹن تک محدود رہ گئیں۔

تجزیہ کاروں کا کہنا ہے کہ اگر طلب کا یہی رجحان برقرار رہا تو آئندہ ہفتوں میں قیمتوں میں مزید تبدیلی دیکھنے میں آ سکتی ہے۔