اسلام آباد: ڈسٹرکٹ اینڈ سیشن کورٹ نے وزیراعلیٰ خیبرپختونخوا سہیل آفریدی کے ناقابلِ ضمانت وارنٹ گرفتاری جاری کرتے ہوئے انہیں گرفتار کرکے عدالت میں پیش کرنے کا حکم دے دیا ہے۔
تفصیلات کے مطابق اسلام آباد ڈسٹرکٹ اینڈ سیشن کورٹ میں وزیراعلیٰ خیبرپختونخوا سہیل آفریدی کے خلاف درج مقدمے کی سماعت ہوئی۔ کیس کی سماعت سینئر سول جج عباس شاہ نے کی۔ عدالت نے بار بار عدم پیشی پر سخت اقدام اٹھاتے ہوئے ان کے ناقابلِ ضمانت وارنٹ گرفتاری جاری کر دیے۔ عدالتی ریکارڈ کے مطابق سہیل آفریدی پر ریاستی اداروں کے خلاف گمراہ کن الزامات لگانے اور ان کی ساکھ کو نقصان پہنچانے کا الزام ہے، جس کے تحت ان کے خلاف مقدمہ درج کیا گیا۔
سماعت کے دوران عدالت نے واضح حکم دیا کہ سہیل آفریدی کو گرفتار کر کے فوری طور پر عدالت میں پیش کیا جائے۔ بعد ازاں عدالت نے کیس کی مزید سماعت 17 جنوری تک ملتوی کر دی۔ واضح رہے کہ وزیراعلیٰ خیبرپختونخوا کے خلاف یہ مقدمہ پیکا ایکٹ کے تحت نیشنل سائبر کرائم انویسٹی گیشن ایجنسی (این سی سی آئی اے) کی جانب سے درج کیا گیا تھا۔
تازہ ترین خبروں کے لیے پی این آئی کا فیس بک پیج فالو کریں
