وفاقی کابینہ نے اسلام آباد میں شیڈول بلدیاتی انتخابات ایک مرتبہ پھر ملتوی کرنے کی منظوری دے دی ہے۔ یہ فیصلہ وزیراعظم شہباز شریف کی زیر صدارت ہونے والے وفاقی کابینہ کے مختصر اجلاس میں کیا گیا۔
اجلاس میں کابینہ کمیٹی برائے قانون سازی کے 3 دسمبر اور 30 دسمبر کو ہونے والے اجلاسوں کے فیصلوں کی توثیق کی گئی۔ ذرائع کے مطابق اجلاس کے دوران وفاقی دارالحکومت میں بلدیاتی نظام سے متعلق نئی قانون سازی پر بھی غور کیا گیا۔ چیف کمشنر اسلام آباد نے کابینہ کو بلدیاتی انتخابات سے متعلق تفصیلی بریفنگ دی، جس کے بعد کابینہ نے انتخابات کے التوا کی باقاعدہ منظوری دے دی۔ ذرائع کا کہنا ہے کہ اس کے ساتھ ساتھ اسلام آباد میں پنجاب کے طرز پر بلدیاتی نظام نافذ کرنے کے لیے قانون سازی کی بھی منظوری دی گئی ہے۔
واضح رہے کہ الیکشن کمیشن آف پاکستان نے اسلام آباد میں بلدیاتی انتخابات کے لیے 15 فروری کی تاریخ مقرر کی تھی، جبکہ نتائج 16 سے 19 فروری کے درمیان مرتب کیے جانا تھے، تاہم وفاقی کابینہ کے فیصلے کے بعد یہ عمل ایک بار پھر تاخیر کا شکار ہو گیا ہے۔
تازہ ترین خبروں کے لیے پی این آئی کا فیس بک پیج فالو کریں
