اسلام آباد: وفاقی وزیر داخلہ محسن نقوی کی زیر صدارت نیشنل پولیس فاؤنڈیشن میں ایک اہم اعلیٰ سطح اجلاس منعقد ہوا، جس میں پولیس افسران اور ملازمین کی فلاح و بہبود سے متعلق کئی بڑے فیصلے کیے گئے۔
اے آر وائی نیوز کے مطابق وزیر داخلہ نے نیشنل پولیس فاؤنڈیشن کا دورہ کیا جہاں اجلاس میں فاؤنڈیشن کے تمام ڈائریکٹرز، ڈپٹی ڈائریکٹرز اور متعلقہ حکام شریک ہوئے۔ اجلاس کے دوران ادارے کی مجموعی کارکردگی اور پولیس ویلفیئر منصوبوں پر تفصیلی بریفنگ دی گئی۔ اجلاس میں فیصلہ کیا گیا کہ پاکستان بھر سے ہر سال 10 انسپکٹرز، سب انسپکٹرز اور اے ایس آئیز کو پولیس سے متعلق ریفریشر کورسز کے لیے بیرونِ ملک بھیجا جائے گا۔ اس کے علاوہ ہر سال ایس پی اور ایس ایس پی رینک کے 5 افسران کو مصنوعی ذہانت (اے آئی) کی ڈگری کے لیے بیرونِ ملک اسکالرشپ فراہم کی جائے گی۔
وزیر داخلہ نے نیشنل پولیس اکیڈمی میں زیر تربیت اے ایس پیز کو ہر سال آسان اور کم اقساط پر پلاٹس فراہم کرنے کی منظوری بھی دی، جبکہ نیشنل پولیس فاؤنڈیشن کے وسائل میں اضافے کے لیے ایک جامع منصوبہ پیش کرنے کی ہدایت کی۔ محسن نقوی نے نیشنل پولیس فاؤنڈیشن کو خسارے سے نکال کر سرپلس میں لانے پر پوری ٹیم کی کارکردگی کو سراہتے ہوئے کہا کہ ادارے کو پولیس ملازمین کی فلاح و بہبود کے لیے ایک فعال اور مؤثر پلیٹ فارم بنایا جائے گا۔
تازہ ترین خبروں کے لیے پی این آئی کا فیس بک پیج فالو کریں
