پاکستان ٹیلی کمیونیکیشن اتھارٹی (پی ٹی اے) نے تمام سمز صارف کے اپنے نام پر رجسٹرڈ ہونا لازمی قرار دے دیا ہے۔
پی ٹی اے نے ٹیلی کام صارفین کے لیے سم کے ذمہ دارانہ استعمال سے متعلق ہدایت نامہ جاری کیا ہے۔ اعلامیے میں کہا گیا ہے کہ کسی اور کے نام پر رجسٹرڈ سم کا استعمال قانون کی خلاف ورزی ہے اور سم کے غلط استعمال کی مکمل ذمہ داری رجسٹرڈ صارف پر عائد ہوگی۔
پی ٹی اے کے مطابق صارفین اپنی سمز اور ٹیلی کمیونیکیشن کنکشنز کے استعمال کے خود ذمہ دار ہوں گے۔ کالز، میسجز اور ڈیٹا کے استعمال پر ضوابط کی پابندی لازمی ہے، اور قواعد کی خلاف ورزی کی صورت میں قانونی کارروائی کی جا سکتی ہے۔
پی ٹی اے نے صارفین پر زور دیا ہے کہ وہ ذمہ دارانہ طرزِ عمل اپنائیں تاکہ مواصلاتی نظام کے تحفظ اور استحکام میں مؤثر کردار ادا کیا جا سکے۔
تازہ ترین خبروں کے لیے پی این آئی کا فیس بک پیج فالو کریں
