پاکستان کو کتنے بیرونی قرضے اور گرانٹس ملیں ۔۔۔؟اہم تفصیلات جاری

پاکستان کو موجودہ مالی سال کے دوران ملنے والے بیرونی قرضے اور گرانٹس کی تفصیلات سامنے آ گئی ہیں۔ اقتصادی امور ڈویژن کی دستاویز کے مطابق پاکستان نے جولائی تا نومبر کے دوران 3 ارب ڈالر سے زائد بیرونی قرضہ حاصل کیا، جو گزشتہ سال اسی مدت کے مقابلے میں 36 کروڑ 40 لاکھ ڈالر زیادہ ہے۔

دستاویز میں بتایا گیا ہے کہ عالمی مالیاتی اداروں کی جانب سے 1 ارب 25 کروڑ ڈالر جبکہ مختلف ممالک سے 80 کروڑ 76 لاکھ ڈالر موصول ہوئے۔ اس کے علاوہ نیا پاکستان سرٹیفکیٹس کے ذریعے 96 کروڑ 59 لاکھ ڈالر کی سرمایہ کاری بھی حاصل کی گئی۔ گزشتہ مالی سال کے ابتدائی پانچ ماہ میں پاکستان کو مجموعی طور پر 2 ارب 66 کروڑ ڈالر کا بیرونی قرض ملا تھا۔

اقتصادی امور ڈویژن کے مطابق عالمی بینک، ایشیائی ترقیاتی بینک، اسلامی ترقیاتی بینک اور سعودی عرب پاکستان کو سب سے زیادہ قرض فراہم کرنے والے ادارے اور ممالک رہے۔ حاصل کیے گئے قرض کی پاکستانی کرنسی میں مجموعی مالیت 858 ارب 27 کروڑ روپے بنتی ہے، جو گزشتہ سال اسی مدت میں ملنے والے 741 ارب روپے کے مقابلے میں 117 ارب روپے زیادہ ہے۔

رپورٹ کے مطابق نان پروجیکٹ ایڈ کی مد میں 531 ارب روپے سے زائد قرض حاصل کیا گیا، جس میں بجٹ سپورٹ کے لیے 273 ارب روپے سے زیادہ شامل ہیں۔ اسلامی ترقیاتی بینک نے 109 ارب روپے کا قلیل مدتی قرض دیا، جبکہ پانچ ماہ کے دوران 141 ارب 76 کروڑ روپے کی سعودی آئل فیسلٹی بھی حاصل کی گئی جو 50 کروڑ ڈالر کے برابر ہے۔

دستاویز میں مزید بتایا گیا ہے کہ مختلف ترقیاتی منصوبوں کے لیے 327 ارب روپے سے زائد قرض لیا گیا، جبکہ جولائی سے نومبر کے دوران پاکستان کو 15 ارب 32 کروڑ روپے کی گرانٹس بھی موصول ہوئیں۔ اقتصادی امور ڈویژن کے مطابق موجودہ مالی سال میں مجموعی طور پر تقریباً 20 ارب ڈالر کی بیرونی مالی معاونت حاصل ہونے کا تخمینہ لگایا گیا ہے۔