پاکستان تحریک انصاف کے مرکزی رہنما عمر ڈار کو سیالکوٹ میں احتجاج کی قیادت کے دوران گرفتار کر لیا گیا۔
تفصیلات کے مطابق عمر ڈار کی گرفتاری پیرس روڈ پر عمل میں آئی جہاں پاکستان تحریک انصاف کی جانب سے عمران خان اور بشریٰ بی بی کے خلاف مقدمات میں سنائی گئی سزاؤں کے خلاف احتجاج کیا جا رہا تھا۔
پاکستان تحریک انصاف کے کارکنان نے پیرس روڈ پر احتجاجی مظاہرہ کیا جس کی قیادت عمر ڈار کر رہے تھے۔ مظاہرین نے حکومت اور عدالتی فیصلوں کے خلاف نعرے بازی کی اور مطالبہ کیا کہ عمران خان اور بشریٰ بی بی کے خلاف مقدمات واپس لیے جائیں۔
پولیس حکام کے مطابق احتجاج بغیر اجازت کے کیا جا رہا تھا جس کے باعث ٹریفک کی روانی متاثر ہوئی، اسی بنیاد پر کارروائی کرتے ہوئے عمر ڈار سمیت متعدد کارکنان کو حراست میں لے لیا گیا۔
پولیس کا کہنا ہے کہ امن و امان برقرار رکھنے کے لیے قانون کے مطابق اقدامات کیے گئے ہیں۔
دوسری جانب تحریک انصاف کے رہنماؤں اور کارکنان نے گرفتاری کی شدید مذمت کرتے ہوئے اسے سیاسی دباؤ کا نتیجہ قرار دیا۔ پارٹی رہنماؤں کا کہنا ہے کہ پرامن احتجاج ہر شہری کا آئینی حق ہے اور گرفتاریوں سے عوام کی آواز کو دبایا نہیں جا سکتا۔
تازہ ترین خبروں کے لیے پی این آئی کا فیس بک پیج فالو کریں
