راولپنڈی: اڈیالہ جیل کے باہر گزشتہ رات دھرنا دینے پر عمران خان کی بہن علیمہ خان سمیت تقریباً 400 افراد کے خلاف مقدمہ درج کر لیا گیا ہے۔
یہ مقدمہ تھانہ صدر بیرونی نے انسداد دہشت گردی ایکٹ کے تحت درج کیا ہے، جس میں 35 افراد کو نامزد کیا گیا ہے۔ نامزد ملزمان میں علیمہ خان، نورین نیازی، قاسم خان، سلمان اکرم راجہ، عالیہ حمزہ، نعیم حیدر پنجوتھہ، تابش فاروق، طیبہ راجا، نادیہ خٹک، ہارون، راجا اسد عباس، ظفر گوندل، شفقت عباس اور علامہ راجہ ناصر عباس شامل ہیں۔
مقدمے میں ریاست کے خلاف مجرمانہ سازش (دفعہ 120) کے علاوہ دفعہ 144 کی خلاف ورزی اور پولیس پر حملوں کے الزامات بھی شامل ہیں۔
تفصیلات کے مطابق 14 ملزمان کو موقع سے گرفتار کر لیا گیا اور انہیں انسداد دہشت گردی عدالت میں پیش کر دیا گیا۔ ملزمان پر الزام ہے کہ انہوں نے حکومت اور ریاستی اداروں کے خلاف نعرے بازی کی، سڑکیں بلاک کیں، اور پولیس پر پتھراؤ اور شیشے کی بوتلیں پھینکیں، جس کے دوران اہلکاروں کی وردیاں بھی پھٹ گئیں۔
پولیس کے مطابق ملزمان نے کارکنوں کو اشتعال دلایا اور مقامی آبادی کو پریشانی میں ڈال دیا، جبکہ پولیس کی انتباہ کے باوجود انہوں نے کارروائی جاری رکھی۔
تازہ ترین خبروں کے لیے پی این آئی کا فیس بک پیج فالو کریں
