پاور ڈویژن کی کوششوں سے بجلی کے سمارٹ میٹرز کی قیمتوں میں نمایاں کمی ریکارڈ کی گئی ہے۔
مسابقتی عمل کو مؤثر بنانے کے نتیجے میں ڈسکوز کے سمارٹ میٹرز کی قیمتوں میں 40 فیصد تک کمی آئی ہے، جس سے ملکی سطح پر تقریباً 150 ارب روپے کی بچت متوقع ہے۔ تھری فیز سمارٹ میٹر کی قیمت 45 ہزار روپے سے کم ہو کر 25 ہزار روپے ہو گئی ہے جبکہ سنگل فیز میٹر کی قیمت میں 7 ہزار روپے کی کمی کی گئی ہے۔
وفاقی وزیر پاور ڈویژن اویس لغاری کا کہنا ہے کہ سمارٹ میٹرز کی قیمتوں میں کمی سے قومی خزانے کو 150 ارب روپے تک فائدہ ہوگا۔ انہوں نے بتایا کہ حکومت نے پاکستان انجینئرنگ کونسل کے ریگولیشنز میں مثبت تبدیلیاں کیں، جس کے باعث بین الاقوامی کمپنیوں نے مسابقتی عمل میں بھرپور حصہ لیا اور انہیں درپیش رکاوٹیں ختم ہو گئیں۔
وفاقی وزیر کے مطابق نئے میٹرز کی قیمت کم ہونے سے بجلی صارفین کو ڈیمانڈ نوٹس کی مد میں کم رقم ادا کرنا پڑے گی۔ سمارٹ میٹرز کے ذریعے غلط ریڈنگ اور بجلی چوری کی فوری نشاندہی ممکن ہو سکے گی، جبکہ صارفین کو پیشگی ادائیگی اور اپنے میٹرز کی براہ راست نگرانی کی سہولت بھی حاصل ہوگی۔
اویس لغاری نے مزید کہا کہ سمارٹ میٹرز کے ذریعے بجلی کے استعمال سے متعلق تفصیلی معلومات دستیاب ہوں گی اور لائن مین کے بغیر بجلی بحالی سمیت دیگر متعدد سہولیات بھی میسر آئیں گی۔
تازہ ترین خبروں کے لیے پی این آئی کا فیس بک پیج فالو کریں
