اسلام آباد: بین الاقوامی مالیاتی فنڈ (آئی ایم ایف) نے بے نظیر انکم سپورٹ پروگرام کے بجٹ میں اضافے پر اطمینان کا اظہار کیا ہے اور پروگرام کی امداد میں مزید اضافہ کرنے کی بھی سفارش کی ہے۔
آئی ایم ایف کے مطابق بین الاقوامی معیار کے مقابلے میں بے نظیر کفالت پروگرام کی رقم کم ہے، تاہم سماجی تحفظ کے لیے اس کے بجٹ کو مضبوط کیا گیا ہے۔ صارفین کی قوتِ خرید برقرار رکھنے کے لیے مراعات میں مناسب اضافہ کیا جا رہا ہے، اور امدادی پروگراموں پر اخراجات میں 20 فیصد اضافہ شامل کیا گیا ہے، جس کے نتیجے میں کفالت پروگرام کے تحت نقد کیش امداد میں اضافہ ہوگا۔
غیر مشروط نقد امداد کی رقم 13,500 روپے سے بڑھا کر 14,500 روپے کی جائے گی، جس سے کفالت پروگرام کی کوریج میں کم از کم دو لاکھ خاندانوں کا اضافہ متوقع ہے۔ مالی سال 2026 کے اختتام تک مستفید خاندانوں کی تعداد 10.2 ملین تک پہنچنے کی توقع ہے، اور نئے گھریلو سروے کے بعد امداد میں مزید اضافہ کیا جانا چاہیے۔
آئی ایم ایف نے تجویز دی ہے کہ کفالت امداد نچلے آمدنی والے طبقے کی کھپت کے 15 فیصد تک لے جائی جائے اور رقم میں افراطِ زر کے مطابق ایڈجسٹمنٹ جاری رکھی جائے۔ ساتھ ہی کنڈیشنل کیش ٹرانسفر پروگرام کی کوریج میں توسیع اور اس کے بجٹ کا مکمل استعمال بھی نہایت اہم قرار دیا گیا ہے۔
تازہ ترین خبروں کے لیے پی این آئی کا فیس بک پیج فالو کریں
