پاکستان دنیا کے پہلے 3 کرپٹو اپنانے والے ممالک میں شامل

اسلام آباد: پاکستان ورچوئل ایسٹس ریگولیٹری اتھارٹی کے چیئرمین بلال بن ثاقب نے پریس بریفنگ میں کہا ہے کہ تاریخ میں پہلی بار عالمی ایکسچینجز کے لیے منظم، شفاف اور عالمی معیار کا راستہ کھول دیا گیا ہے۔

انہوں نے بتایا کہ بائنانس اور ایچ ٹی ایکس کو این او سی جاری کرنا اس نئی سوچ کا عملی قدم ہے، جس کے تحت اینٹی منی لانڈرنگ اور دہشت گردی کی مالی معاونت کی نگرانی ممکن ہوگی۔

بلال بن ثاقب نے کہا کہ پاکستان نے کوئی انوکھا ماڈل متعارف نہیں کرایا بلکہ دنیا کے بڑے مالی مراکز اسی طرح کے مرحلہ وار ماڈلز اپناتے ہیں۔ پاکستان دنیا کے پہلے تین کرپٹو اپنانے والے ممالک میں شامل ہے۔

انہوں نے بتایا کہ 3 سے 4 کروڑ پاکستانی ڈیجیٹل اثاثے استعمال کر رہے ہیں اور عالمی مالیاتی نظام کے تحت بروقت اور درست فیصلے کرنے کی ضرورت ہے۔ اس فریم ورک سے نہ صرف ٹریڈنگ بلکہ صنعتوں کو بھی فائدہ ہوگا۔

چیئرمین پاکستان ورچوئل ایسٹس ریگولیٹری اتھارٹی نے مزید کہا کہ پاکستان اگلے دس سال میں ٹیکنالوجی کے ذریعے اپنی خودمختاری مستحکم کر لے گا اور نوجوانوں کو مستقبل کی تیاری کرنے کا پیغام دیا۔