انسداد دہشت گردی عدالت نے علیمہ خان کے ضمانتی مچلکے ضبط کرنے کا حکم دے دیا ہے۔ راولپنڈی کی انسداد دہشت گردی عدالت میں علیمہ خان سمیت 11 ملزمان کے خلاف 26 نومبر کے احتجاج پر درج مقدمے کی سماعت ہوئی، تاہم علیمہ خان اور ان کے وکلا عدالت میں پیش نہیں ہوئے۔
عدالت میں عدم حاضری پر پراسیکیوشن نے علیمہ خان کے ضمانتی مچلکے ضبط کرنے کی استدعا کی اور مؤقف اختیار کیا کہ ملزمہ نے عدالت کو یقین دہانی کرائی تھی کہ وہ ہر سماعت پر پیش ہوں گی۔ پراسیکیوٹر کی استدعا پر عدالت نے علیمہ خان کے ضمانتی مچلکے ضبط کرنے کا حکم جاری کر دیا اور ان کے قابل ضمانت وارنٹ کے ساتھ ضمانت منسوخی کے نوٹس بھی جاری کر دیے۔
عدالت نے علیمہ خان کے دس، دس لاکھ کے دو ضمانتی مچلکے ضبط کرنے کا حکم دیا۔ بعد ازاں عدالت نے کیس کی مزید سماعت 15 دسمبر تک ملتوی کر دی، اور عدالتی کارروائی ملتوی ہونے کے بعد علیمہ خان اپنے وکیل کے ہمراہ عدالت پہنچیں۔
تازہ ترین خبروں کے لیے پی این آئی کا فیس بک پیج فالو کریں
