ملکی سطح پر تیل و گیس کے پیداواری شعبے سے ایک اچھی خبر سامنے آئی ہے، جس کے مطابق خیبر پختونخوا میں واقع نشپا بلاک سے بڑی مقدار میں تیل و گیس دریافت ہوئی ہے۔
خیبر پختونخوا میں گیس و تیل کی یہ دریافت او جی ڈی سی نے کی ہے۔ ہراگزئی ایکس 1 کنویں سے یومیہ دو ہزار دو سو اسی بیرل تیل کی پیداوار دریافت ہوئی ہے۔ او جی ڈی سی کے مطابق اسی کنویں سے پانچ اعشاریہ چھ ملین معکب فٹ گیس کی پیداوار بھی دریافت ہوئی ہے۔
نشپا بلاک میں کنگریالی فارمیشن سے یہ پہلی ہائیڈرو کاربن دریافت ہے۔ ہراگزئی ایکس-1 کنویں کی ڈرلنگ پانچ ہزار ایک سو ستر میٹر کی گہرائی تک مکمل کی گئی۔ نشپا بلاک میں او جی ڈی سی بطور آپریٹر پینسٹھ فیصد حصہ دار ہے، جبکہ پی پی ایل تیس فیصد اور جی ایچ پی ایل پانچ فیصد کے شراکت دار ہیں۔
اس نئی دریافت سے او جی ڈی سی کے ذخائر میں مزید اضافہ ہوگا اور ملکی توانائی کی ضروریات کو پورا کرنے میں مدد ملے گی۔
تازہ ترین خبروں کے لیے پی این آئی کا فیس بک پیج فالو کریں
