کراچی: پاکستان اسپیس اینڈ اپر ایٹموسفیئر ریسرچ کمیشن (سپارکو) کے مطابق سال 2025 کا آخری سپر مون، جسے دسمبر کا ’کولڈ مون‘ بھی کہا جاتا ہے، آج رات آسمان پر اپنی پوری آب و تاب کے ساتھ دکھائی دے گا۔
سپارکو کا کہنا ہے کہ یہ سپر مون 4 اور 5 دسمبر کی درمیانی شب پاکستان بھر میں واضح طور پر دیکھا جاسکے گا۔ یہ سال کا تیسرا مسلسل سپر مون ہے جو 5 دسمبر کی صبح 4 بج کر 15 منٹ پر تقریباً 99.8 فیصد روشن حالت میں اپنے عروج پر پہنچے گا۔ محکمے کے مطابق 4 دسمبر کی شام 4 بج کر 58 منٹ پر چاند 99.2 فیصد روشنی کے ساتھ طلوع ہوگا، جبکہ 4 اور 5 دسمبر کی شب چاند اور زمین کے درمیان فاصلہ 357,218 کلومیٹر ریکارڈ کیا جائے گا۔
سپارکو نے بتایا کہ سپر مون کے دوران چاند معمول کے مقابلے میں تقریباً 7.9 فیصد بڑا اور 15 فیصد زیادہ روشن نظر آتا ہے۔ دنیا بھر میں سپر مون سال میں عام طور پر تین سے چار مرتبہ دیکھا جاتا ہے۔
تازہ ترین خبروں کے لیے پی این آئی کا فیس بک پیج فالو کریں
