پاکستان اور مصر کے وزرائے خارجہ کے درمیان وفود کی سطح پر ملاقات ہوئی جس میں معیشت، دفاع اور دیگر شعبوں میں تعاون بڑھانے پر اتفاق کیا گیا۔ بعد ازاں مشترکہ پریس کانفرنس میں وزیر خارجہ اسحاق ڈار نے مصری وزیر خارجہ کے دورۂ پاکستان کا گرمجوشی سے خیر مقدم کرتے ہوئے اسے دونوں ممالک کے تاریخی اور برادرانہ تعلقات کو مزید مضبوط بنانے میں اہم قرار دیا۔
اسحاق ڈار کا کہنا تھا کہ پاکستان اور مصر کے درمیان دیرینہ شراکت داری موجود ہے اور سکیورٹی سمیت مختلف شعبوں میں تعاون مسلسل فروغ پا رہا ہے۔ انہوں نے کہا کہ مصری وزیر خارجہ کا دورہ مشترکہ اہداف کے حصول کے علاوہ سیاسی، معاشی، دفاعی، ثقافتی اور عوامی سطح پر تعلقات کو مزید بہتر بنانے میں معاون ہو گا۔ پاکستان نے سرمایہ کاری کے نئے مواقع تلاش کرنے کے لیے مصر کو 250 بزنس ہاؤسز کی فہرست فراہم کرنے کا فیصلہ بھی کیا ہے۔
مصری وزیر خارجہ نے پاکستان کی میزبانی پر شکریہ ادا کرتے ہوئے کہا کہ دونوں ممالک کے درمیان خوشگوار اور برادرانہ تعلقات قائم ہیں جنہیں مزید وسعت دینے کے لیے عزم موجود ہے۔ انہوں نے اسلام آباد اور پشاور میں حالیہ دہشت گرد حملوں کی مذمت کی اور جانی نقصان پر افسوس کا اظہار کیا۔
مصری وزیر خارجہ نے کہا کہ پاکستان اور مصر مشترکہ چیلنجز سے نمٹنے کے لیے مل کر کام کر رہے ہیں اور سیاسی مکالمے، معاشی شراکت داری، دفاع اور سکیورٹی سمیت تمام شعبوں میں تعاون بڑھانے پر اتفاق ہوا ہے۔ انہوں نے بتایا کہ غزہ میں امن کے لیے کوششیں جاری ہیں اور پاکستان نے جنگ بندی معاہدے میں اہم کردار ادا کیا ہے۔ مصر غزہ کی تعمیر نو میں پاکستان کے مزید تعاون کا خواہاں ہے۔
دونوں وزرائے خارجہ نے مقبوضہ کشمیر، افغانستان اور دیگر عالمی امور پر بھی بات چیت کی اور کثیرالجہتی فورمز پر تعاون جاری رکھنے کے عزم کا اظہار کیا۔
تازہ ترین خبروں کے لیے پی این آئی کا فیس بک پیج فالو کریں
