اسلام آباد : وزارتِ خزانہ نے مہنگائی میں اضافے کا امکان ظاہر کرتے ہوئے کہا ہے کہ خوراک کی قیمتوں اور زرعی پیداوار پر دباؤ کے باعث مہنگائی میں اضافہ ہو سکتا ہے۔ وزارتِ خزانہ کی ماہانہ معاشی رپورٹ کے مطابق آئندہ ماہ مہنگائی کی شرح 5 سے 6 فیصد کے درمیان رہنے کی توقع ہے۔
رپورٹ میں بتایا گیا ہے کہ خوراک کی قیمتوں اور زرعی پیداوار میں دباؤ مہنگائی میں معمولی اضافے کا سبب بن سکتا ہے۔ مجموعی طور پر ملک کی معاشی صورتحال محتاط طور پر مثبت ہے اور صنعتی سرگرمیوں میں بتدریج بہتری جاری ہے۔ معاشی اصلاحات کے نفاذ سے اقتصادی سرگرمیوں میں استحکام آ رہا ہے۔
زرعی شعبے سے متعلق رپورٹ میں بتایا گیا کہ فصلوں کا مجموعی منظرنامہ ملا جلا ہے، تاہم مناسب زرعی ان پٹس کی دستیابی سے صورتحال بہتر ہونے کی امید ہے۔ حکومت کے معاون اقدامات کے باعث ربیع سیزن میں سپلائی لائنز مزید مستحکم ہونے کا امکان ظاہر کیا گیا ہے۔
رپورٹ کے مطابق معیشت بتدریج استحکام کی طرف بڑھ رہی ہے اور ساختی اصلاحات کے نتائج سامنے آنا شروع ہو چکے ہیں۔ مالی نظم و ضبط میں بہتری اور محصولات میں اضافہ ہوا ہے جبکہ حکومتی اخراجات میں بھی محتاط حکمت عملی برقرار رکھی جائے گی۔ ترسیلات زر میں اضافہ، بڑے پیداواری شعبوں میں بہتری اور آئی ٹی برآمدات کا بڑھنا بھی معیشت کے لیے مثبت اشارے ہیں۔
وزارتِ خزانہ کے مطابق جولائی سے ستمبر کے دوران پبلک ڈیٹ میں 1371 ارب روپے کی نمایاں کمی ریکارڈ کی گئی، جو پانچ سال بعد پہلی بار کسی ایک سہ ماہی میں اتنی بڑی کمی ہے۔ مہنگے قرضوں کی قبل از وقت ادائیگی سے مستقبل میں مالی خطرات کم ہونے کے امکانات بھی بڑھ گئے ہیں۔
رپورٹ میں کہا گیا ہے کہ اقتصادی استحکام کے لیے حکومتی حکمت عملی مؤثر ثابت ہو رہی ہے اور آنے والے مہینوں میں معاشی اشاریوں میں مزید بہتری کی توقع ہے۔
تازہ ترین خبروں کے لیے پی این آئی کا فیس بک پیج فالو کریں
