بجلی صارفین کیلئے اچھی خبر

ملک بھر کے بجلی صارفین کے لیے ایک خوشخبری سامنے آئی ہے، جہاں ایک ماہ کے لیے بجلی کی قیمت میں 65 پیسے فی یونٹ کمی کا امکان ظاہر کیا گیا ہے۔

سینٹرل پاور پرچیزنگ ایجنسی (سی پی پی اے) نے اکتوبر کی ماہانہ فیول پرائس ایڈجسٹمنٹ کے تحت نیپرا کو درخواست جمع کرا دی ہے، جس پر آج سماعت ہوگی۔ ایجنسی نے اپنی درخواست میں مؤقف اختیار کیا ہے کہ اکتوبر کے دوران فیول لاگت میں کمی کے باعث بجلی کی قیمت میں 65 پیسے فی یونٹ کمی کی جا سکتی ہے۔

نیپرا اتھارٹی اس درخواست پر آج سماعت کرے گی اور اگر قیمت میں کمی کی منظوری دے دی گئی تو اس کا اطلاق کے الیکٹرک کے صارفین پر بھی ہوگا۔

اکتوبر میں بجلی کی پیداوار کے حوالے سے سی پی پی اے کی رپورٹ کے مطابق، پانی سے بجلی کی پیداوار 27.36 فیصد رہی، جس نے مجموعی لاگت کم کرنے میں اہم کردار ادا کیا۔ دیگر ذرائع میں مقامی کوئلے سے 12.76 فیصد، درآمدی کوئلے سے 4.71 فیصد، گیس سے 9.16 فیصد، درآمدی آر ایل این جی سے 19.72 فیصد اور نیوکلئیر ذرائع سے 22.13 فیصد بجلی پیدا ہوئی۔

سی پی پی اے کا کہنا ہے کہ سستے ذرائع سے پیداوار بڑھنے کے باعث صارفین کو ریلیف دینے کی گنجائش پیدا ہوئی ہے۔ نیپرا کی آج ہونے والی سماعت کے بعد یہ واضح ہو جائے گا کہ صارفین کو آئندہ ماہ کتنی کمی کا فائدہ مل سکے گا۔