لاہور: پنجاب کی وزیرِ اطلاعات عظمیٰ بخاری نے صوبے میں غیرقانونی طور پر مقیم افغان اور دیگر غیرملکی شہریوں کے خلاف جاری کارروائی کے حوالے سے اہم اعلان کیا ہے۔ ان کا کہنا ہے کہ ایسے افراد کی نشاندہی کرنے والوں کو نقد انعام دیا جائے گا۔
اپنے بیان میں عظمیٰ بخاری نے بتایا کہ پنجاب بھر میں غیرقانونی مقیم افغان اور غیرملکی شہریوں کے خلاف آپریشن تیزی سے جاری ہے اور نشاندہی کرنے والوں کی حوصلہ افزائی کے لیے انعامی رقم مقرر کی گئی ہے۔ ان کے مطابق پچھلے تین ہفتوں کے دوران 6 ہزار 220 افغان شہریوں کو وطن واپس بھیجا جا چکا ہے۔ واضح رہے کہ 2001 میں طالبان حکومت کے خاتمے کے بعد، اقوام متحدہ کے ادارہ برائے مہاجرین نے افغان مہاجرین کی رضاکارانہ واپسی کا پروگرام شروع کیا تھا۔ 2002 سے 2005 تک تقریباً 30 لاکھ افغان مہاجرین پاکستان سے واپس افغانستان گئے، جو افغان مہاجرین کی پہلی بڑی واپسی تھی۔
بعدازاں، 2016 میں نیشنل ایکشن پلان کے تحت حکومتِ پاکستان نے افغان مہاجرین کی بڑے پیمانے پر واپسی کا اعلان کیا، جس کے نتیجے میں 3 لاکھ 70 ہزار افغان شہری واپس گئے جبکہ 8 لاکھ افراد کو افغان سٹیزن کارڈ جاری کیے گئے۔
تازہ ترین خبروں کے لیے پی این آئی کا فیس بک پیج فالو کریں
