لاہور ہائیکورٹ نے دھواں چھوڑنے والی گاڑیوں کے خلاف فوری کارروائی کا حکم دیتے ہوئے ریمارکس دیے کہ اب شہر میں کوئی دھواں چھوڑتی گاڑی نظر نہیں آنی چاہیے۔
جسٹس شاہد کریم نے ہارون فاروق سمیت دیگر کی جانب سے سموگ کے خلاف دائر درخواستوں پر سماعت کے دوران کہا کہ سڑکوں پر درجنوں گاڑیاں دھواں چھوڑتی دکھائی دیتی ہیں اور محکمہ ماحولیات کی کارکردگی اطمینان بخش نہیں۔
عدالت نے ہدایت کی کہ لاری اڈوں پر محکمہ ماحولیات کے افسران کے ساتھ پولیس اہلکار بھی تعینات کیے جائیں تاکہ آلودگی پھیلانے والی گاڑیوں کے خلاف موقع پر کارروائی کی جا سکے۔
جسٹس شاہد کریم نے ریمارکس دیے کہ اگر عدالتی احکامات پر بروقت عمل کیا جاتا تو لاہور کی فضا کی صورتحال مختلف ہوتی۔ عدالت نے پرانے ٹائروں کو جلانے یا ان کی پروسیسنگ کرنے والے پلانٹس کے خلاف کارروائی کا بھی حکم دیا۔
درختوں کی کٹائی پر اظہارِ تشویش کرتے ہوئے عدالت نے عدالتی معاون کو موقع پر جا کر رپورٹ پیش کرنے کی ہدایت دی۔ ڈی جی پی ایچ اے کو حکم دیا گیا کہ عدالتی احکامات پر مکمل عملدرآمد یقینی بنایا جائے اور آئندہ سماعت پر رپورٹ جمع کرائی جائے۔
واسا کے سینئر لیگل ایڈوائزر میاں عرفان اکرم نے عدالت میں رپورٹ پیش کی، جس کے بعد کیس کی مزید سماعت 10 نومبر تک ملتوی کر دی گئی۔
تازہ ترین خبروں کے لیے پی این آئی کا فیس بک پیج فالو کریں
