سابق وزیراعلیٰ انتقال کر گئے

کراچی: پاکستان پیپلز پارٹی کے سینئر رہنما اور سابق وزیراعلیٰ سندھ آفتاب شعبان میرانی طویل علالت کے بعد انتقال کر گئے۔ اہلِ خانہ نے ان کے انتقال کی تصدیق کر دی ہے۔

خاندانی ذرائع کے مطابق آفتاب شعبان میرانی کی نمازِ جنازہ آج رات 10 بجے مسجد بیت الاسلام، ڈیفنس فیز فور میں ادا کی جائے گی، جبکہ تدفین گذری قبرستان میں کی جائے گی۔ آفتاب شعبان میرانی کا تعلق ضلع شکارپور سے تھا اور وہ گزشتہ کئی برسوں سے کراچی میں مقیم تھے۔ انہیں ایک ہفتہ قبل اسپتال سے گھر منتقل کیا گیا تھا۔ وہ پاکستان پیپلز پارٹی کے سینیئر ترین رہنماؤں میں شمار کیے جاتے تھے اور ذوالفقار علی بھٹو و بے نظیر بھٹو کے قریبی ساتھیوں میں شامل تھے۔

صدرِ مملکت آصف علی زرداری نے آفتاب شعبان میرانی کے انتقال پر گہرے دکھ اور افسوس کا اظہار کرتے ہوئے کہا کہ وہ پارٹی کے مخلص اور نظریاتی رہنما تھے۔ وزیراعلیٰ سندھ سید مراد علی شاہ اور اسپیکر صوبائی اسمبلی اویس قادر شاہ نے بھی ان کے انتقال پر افسوس کا اظہار کیا اور مرحوم کے لیے دعاے مغفرت کی۔ یاد رہے کہ وزیراعلیٰ سندھ مراد علی شاہ نے گزشتہ ہفتے کراچی کے ساؤتھ سٹی اسپتال میں آفتاب شعبان میرانی کی عیادت بھی کی تھی۔