ریٹائرڈ ملازمین کے لیے نیا بحران

کراچی: پی آئی اے کی نجکاری سے قبل ریٹائرڈ ملازمین کے لیے نیا مالی بحران کھڑا ہوگیا۔ قومی ایئرلائن کے تقریباً 16 ہزار سابق ملازمین کو ستمبر کی پنشن تاحال ادا نہیں کی گئی۔

ذرائع کے مطابق پنشن کی ادائیگی میں تاخیر کے باعث بزرگ ریٹائرڈ ملازمین شدید مشکلات کا شکار ہیں۔ پنشن کی ادائیگی کی ذمہ داری پی آئی اے ہولڈنگ کمپنی پر ہے، تاہم تاخیر کی کوئی واضح وجہ سامنے نہیں آسکی۔ ذرائع کا کہنا ہے کہ پی آئی اے ہولڈنگ کمپنی کے سی ای او اسد رسول سے مؤقف لینے کے لیے متعدد بار رابطے کی کوشش کی گئی، مگر انہوں نے جواب نہیں دیا۔

قومی ایئرلائن ریٹائرڈ ایمپلائز ایسوسی ایشن کے صدر سید طاہر حسین کے مطابق، ’’پنشن کی عدم ادائیگی نے بزرگ ملازمین کو مالی بحران میں مبتلا کردیا ہے۔ کئی بار کمپنی سیکریٹری اور چیف فنانس افسر سے رابطہ کیا، مگر کوئی تسلی بخش جواب نہیں ملا۔‘‘ ریٹائرڈ ملازمین نے حکومت اور متعلقہ حکام سے اپیل کی ہے کہ فوری طور پر پنشن کی ادائیگی یقینی بنائی جائے تاکہ بزرگ شہری مزید مشکلات سے بچ سکیں۔