پنجاب حکومت نے نوجوان گریجویٹس اور انٹرمیڈیٹ طلبہ کے لیے انٹرن شپ پروگرام کا اعلان کر دیا ہے، جس کے تحت شرکاء کو ماہانہ 55 ہزار سے 65 ہزار روپے تک وظیفہ دیا جائے گا۔
تفصیلات کے مطابق، صوبائی حکومت نے کالجوں میں انٹرن اساتذہ کے لیے 4 ارب 21 کروڑ روپے سے زائد کا پیکیج منظور کیا ہے، جس کے تحت صوبے بھر کے 8 ہزار سے زیادہ انٹرن اساتذہ کو مالی معاونت فراہم کی جائے گی۔ اس منصوبے کا مقصد نوجوانوں کو تدریسی تجربہ حاصل کرنے کے مواقع فراہم کرنا اور انہیں عملی میدان کے لیے تیار کرنا ہے۔
انٹرمیڈیٹ سطح کے انٹرنز کو سات ماہ تک ماہانہ 55 ہزار روپے، جبکہ بی ایس سطح کے انٹرنز کو دس ماہ تک ماہانہ 65 ہزار روپے دیے جائیں گے۔ انٹرن شپ مکمل کرنے والے تمام شرکاء کو تجربے کے سرٹیفکیٹ بھی جاری کیے جائیں گے تاکہ ان کے کیریئر کے امکانات بہتر بنائے جا سکیں۔
پروگرام میں مساوی مواقع کے پیش نظر 404 نشستیں اقلیتوں، 243 نشستیں معذور افراد اور 40 نشستیں خواجہ سراؤں کے لیے مخصوص کی گئی ہیں۔
حکومت پنجاب کے مطابق، اس منصوبے پر مجموعی طور پر 4.217 ارب روپے خرچ کیے جائیں گے۔ حکام کا کہنا ہے کہ ماہانہ وظیفہ نوجوانوں کی مالی مشکلات میں کمی کرے گا اور انہیں تدریسی سرگرمیوں میں بھرپور شرکت کی ترغیب دے گا۔
تازہ ترین خبروں کے لیے پی این آئی کا فیس بک پیج فالو کریں
