اسلام آباد: ڈاکٹر عافیہ صدیقی کی رہائی اور وطن واپسی سے متعلق کیس میں اہم پیش رفت سامنے آئی ہے۔ اسلام آباد ہائیکورٹ نے کیس کی سماعت 29 اکتوبر کو مقرر کرتے ہوئے چار رکنی لارجر بینچ تشکیل دے دیا ہے۔
رجسٹرار آفس کی جانب سے جاری کردہ کاز لسٹ کے مطابق لارجر بینچ کی سربراہی جسٹس ارباب محمد طاہر کریں گے، جب کہ بینچ کے دیگر ارکان میں جسٹس خادم حسین سومرو، جسٹس اعظم خان اور جسٹس راجہ انعام امین منہاس شامل ہوں گے۔ذرائع کے مطابق گزشتہ سماعت بینچ کے ایک رکن کی عدم دستیابی کے باعث منسوخ ہوگئی تھی۔ بعد ازاں جسٹس انعام امین منہاس نے یکم ستمبر کو فائل چیف جسٹس کو بھجوائی تھی تاکہ نیا لارجر بینچ تشکیل دیا جا سکے۔
قبل ازیں یہ کیس جسٹس سردار اعجاز اسحاق خان کی عدالت میں زیرِ سماعت تھا، جنہوں نے پچھلی سماعت پر وزیراعظم اور کابینہ کے ارکان کو توہینِ عدالت کے نوٹسز جاری کیے تھے۔ تاہم جسٹس اعجاز کے اسپیشل ڈویژن بینچ میں تبادلے کے بعد ان کے سنگل بینچ کے کیسز ٹرانسفر کر دیے گئے تھے۔
تازہ ترین خبروں کے لیے پی این آئی کا فیس بک پیج فالو کریں
