مظفرآباد: مسلم لیگ (ن) نے آزاد کشمیر حکومت سے علیحدگی کا باضابطہ اعلان کر دیا۔
تفصیلات کے مطابق ن لیگ آزاد کشمیر کے صدر غلام قادر نے کہا کہ اگر پیپلز پارٹی تحریکِ عدم اعتماد لاتی ہے تو یہ ان کا جمہوری حق ہے، تاہم مسلم لیگ (ن) کسی نئی یا غیر فطری حکومت سازی کا حصہ نہیں بنے گی۔
انہوں نے واضح کیا کہ ن لیگ اب اپوزیشن میں بیٹھے گی اور پارٹی پالیسی سے انحراف کرنے والوں کے خلاف کارروائی کی جائے گی۔
غلام قادر نے کہا کہ نئی حکومت صرف شفاف عام انتخابات کے ذریعے ہی ممکن ہے، ن لیگ کشمیری مہاجرین اور بیرون ملک مقیم کشمیریوں کی فلاح و بہبود کے لیے سرگرم رہے گی۔
انہوں نے مزید کہا کہ مسلم لیگ (ن) آزاد کشمیر میں آئینی و سیاسی بحران کے حل میں مثبت کردار ادا کرتی رہے گی۔ ن لیگ ایک منظم اور عوامی حمایت یافتہ جماعت کے طور پر سامنے آئی ہے۔
غلام قادر کا کہنا تھا کہ پارٹی کا متفقہ فیصلہ ہے کہ وہ وزیراعظم انوارالحق کی حکومت کا حصہ نہیں رہے گی۔ نواز شریف اور شہباز شریف کی قیادت میں ن لیگ آئندہ عام انتخابات کے لیے بھرپور مہم چلائے گی۔
تازہ ترین خبروں کے لیے پی این آئی کا فیس بک پیج فالو کریں