وزیراعظم یوتھ پروگرام کے تحت ملک بھر میں نوجوانوں کے لیے “اسپیشلائزڈ ڈیجیٹل اسکلز ٹریننگ آف ٹرینرز” پروگرام کا آغاز کر دیا گیا ہے۔
وزیراعظم یوتھ پروگرام کے چیئرمین رانا مشہود احمد خان نے بتایا کہ اس پروگرام کے ابتدائی مرحلے میں 200 ٹرینرز کو آن لائن تربیت دی جائے گی۔ انہیں مصنوعی ذہانت، ای کامرس، ڈیجیٹل مارکیٹنگ اور ڈیٹا اینالٹکس جیسے جدید شعبوں میں مہارت فراہم کی جائے گی۔
رانا مشہود احمد خان نے نیوٹیک ہیڈ کوارٹر میں افتتاحی تقریب سے خطاب کرتے ہوئے کہا کہ یہ پروگرام نوجوانوں کو عالمی معیار کی ڈیجیٹل مہارتیں سکھانے کی جانب ایک اہم قدم ہے۔
انہوں نے بتایا کہ یہ منصوبہ نیوٹیک، یونی سروسز انٹرنیشنل اور آئی ٹی ایم سی چائنا کے اشتراک سے شروع کیا گیا ہے، جو پاکستان میں ڈیجیٹل اسکلز کے ایک نئے دور کا آغاز ثابت ہوگا۔ تربیت مکمل کرنے والے ٹرینرز کو پاکستان اور چین کے معروف اداروں کی مشترکہ اسناد دی جائیں گی۔
چیئرمین یوتھ پروگرام کے مطابق “پریکٹس آف اسکلز” پلیٹ فارم کے ذریعے نوجوانوں اور فری لانسرز کو مفت ڈیجیٹل لرننگ اکاؤنٹس فراہم کیے جائیں گے، جس سے ملک میں ڈیجیٹل خواندگی کو فروغ ملے گا۔
انہوں نے مزید کہا کہ یہ اقدام پاکستان اور چین کے درمیان ڈیجیٹل تعاون اور انسانی وسائل کی ترقی کو مضبوط بنائے گا۔ پروگرام پبلک پرائیویٹ پارٹنرشپ کے تحت پاکستان کے ٹیکنیکل ایجوکیشن نظام کو جدید خطوط پر استوار کرنے میں مددگار ثابت ہوگا۔
تقریب میں یوتھ پروگرام، نیوٹیک، ٹیوٹ، بین الاقوامی شراکت داروں اور وزارتِ تعلیم و تربیت کے اعلیٰ حکام نے بھی شرکت کی۔
تازہ ترین خبروں کے لیے پی این آئی کا فیس بک پیج فالو کریں
