نیشنل سائبر کرائم انویسٹی گیشن ایجنسی (NCCIA) نے خاتون کارکن فلک جاوید کو لاہور کے علاقے اچھرہ سے گرفتار کر لیا ہے۔ حکام کے مطابق فلک جاوید دو مختلف مقدمات میں مطلوب تھیں، جن میں ایک ریاستی اداروں کے خلاف مبینہ پروپیگنڈا کا مقدمہ ہے جبکہ دوسرے میں ایک خاتون سیاست دان کے خلاف نازیبا زبان کے استعمال کا الزام شامل ہے۔
ایجنسی کے ترجمان کے مطابق فلک جاوید کو قانونی کارروائی کے لیے متعلقہ تھانے منتقل کر دیا گیا ہے۔
واضح رہے کہ آج ہی اسلام آباد ہائیکورٹ میں فلک جاوید کی بازیابی کے لیے ایک درخواست دائر کی گئی تھی۔ درخواست ان کے والد جاوید اقبال کی جانب سے ایڈووکیٹ میاں علی اشفاق کے ذریعے جمع کرائی گئی۔
درخواست میں مؤقف اختیار کیا گیا کہ فلک جاوید کو لاپتا کر دیا گیا ہے، اور عدالت سے استدعا کی گئی کہ انہیں فوری طور پر عدالت کے سامنے پیش کیا جائے۔ ساتھ ہی یہ بھی مطالبہ کیا گیا کہ ان کے خلاف درج مقدمات کی تفصیلات فراہم کی جائیں اور کیس کی سماعت فوری طور پر (آج ہی) کی جائے۔
تازہ ترین خبروں کے لیے پی این آئی کا فیس بک پیج فالو کریں
