حکومت نےسیلاب متاثرین کیلئےائیرلفٹ ڈرون حاصل کرلیا

پاکستان میں قدرتی آفات کے دوران ریسکیو اینڈ ریلیف آپریشنز کی تاریخ میں ایک اہم سنگِ میل عبور کر لیا گیا ہے۔ حکومت پنجاب نے سیلاب متاثرین کی مدد کے لیے ملک کا پہلا جدید “ایئرلفٹ ڈرون” حاصل کر لیا ہے، جو 200 کلوگرام وزنی شخص کو محفوظ مقام تک منتقل کرنے کی صلاحیت رکھتا ہے۔

پنجاب کے سیکرٹری داخلہ نے بتایا کہ یہ ایئرلفٹ ڈرون جنوبی پنجاب میں سیلاب سے متاثرہ علاقوں میں ریسکیو آپریشنز کے لیے ملتان روانہ کر دیا گیا ہے۔

ڈرون کی کامیاب ٹیسٹ فلائٹس
سول ڈیفنس پنجاب نے ڈرون کی روانگی سے قبل کامیاب ٹیسٹ فلائٹس مکمل کیں، جن کی ویڈیو حکومتِ پنجاب کے آفیشل “ایکس” (سابقہ ٹوئٹر) اکاؤنٹ پر جاری کی گئی ہے۔

مزید ڈرونز کی خریداری کا فیصلہ
سیکرٹری داخلہ نے اعلان کیا کہ سول ڈیفنس کے لیے 10 مزید ایئرلفٹ ڈرونز خریدنے کا فیصلہ کیا گیا ہے تاکہ آئندہ قدرتی آفات اور ہنگامی صورتحال میں بروقت اور مؤثر ریسکیو ممکن بنایا جا سکے۔

پاکستان میں اپنی نوعیت کی پہلی ڈرون سروس
یہ ایئرلفٹ ڈرون سروس پاکستان میں اپنی نوعیت کی پہلی ایمرجنسی ڈرون سروس ہے، جو ریسکیو کے شعبے میں جدید ٹیکنالوجی کے استعمال کی جانب ایک انقلابی قدم تصور کی جا رہی ہے۔

سول ڈیفنس کو جدید خطوط پر استوار کیا جا رہا ہے
سیکرٹری داخلہ کا کہنا تھا کہ محکمہ داخلہ پنجاب، سول ڈیفنس ریزیلئنس کور کو جدید تقاضوں کے مطابق ڈھال رہا ہے تاکہ ہنگامی حالات میں بہتر کارکردگی ممکن ہو۔ انہوں نے سول ڈیفنس کے تربیت یافتہ اہلکاروں اور رضاکاروں کو “فرنٹ لائن سولجرز” قرار دیتے ہوئے کہا کہ یہ لوگ قیمتی انسانی جانیں بچانے میں کلیدی کردار ادا کر رہے ہیں۔