سیلابی پانی کے باعث کرتارپور کا پورا علاقہ زیرِ آب آگیا اور گھروں و کھیتوں میں پانی داخل ہوگیا۔ حکام کی جانب سے ریڈ الرٹ جاری کرتے ہوئے شہریوں کو دریاؤں کے کناروں سے دور رہنے کی ہدایت کی گئی ہے جبکہ متاثرہ افراد کی محفوظ مقامات پر منتقلی جاری ہے۔
بھارتی ہائی کمیشن کی اطلاعات پر انڈس واٹر کمشنر نے فلڈ الرٹ جاری کیا ہے جس کے مطابق دریائے ستلج میں ہیڈ ہریکے زیریں اور فیروزپور زیریں، دریائے راوی میں مادھوپور زیریں اور دریائے چناب میں اکھنور کے مقامات پر اونچے درجے کے سیلاب کی پیشگوئی ہے۔
بھارت کی جانب سے دریائے راوی میں 2 لاکھ کیوسک کا ریلا چھوڑنے کے بعد دریائے راوی، چناب اور ستلج میں طغیانی آ گئی ہے۔ دریائے چناب میں ہیڈ مرالہ کے مقام پر پانی کی آمد 6 لاکھ 96 ہزار 534 کیوسک ریکارڈ کی گئی جبکہ دریائے ستلج میں گنڈا سنگھ والا پر پانی کا بہاؤ 2 لاکھ 45 ہزار 236 کیوسک ہے، جو آئندہ 12 گھنٹوں میں بڑھ کر 2 لاکھ 80 ہزار کیوسک تک پہنچنے کا امکان ہے۔
تازہ ترین خبروں کے لیے پی این آئی کا فیس بک پیج فالو کریں
