راولپنڈی کے رنیال گاؤں میں گیس اور تیل تلاش کرنے والی ایک نجی کمپنی کی زیرزمین پائپ لائن سے کروڑوں روپے مالیت کے کروڈ آئل کی چوری کا انکشاف ہوا ہے۔ پولیس کے مطابق چوری کا ایک خفیہ کنکشن پکڑا گیا ہے جس کے بعد کمپنی کے چیف ایگزیکٹو ایڈمن کی مدعیت میں مقدمہ درج کر لیا گیا ہے۔
ایف آئی آر کے مطابق ملزمان نے نجی آئل فیلڈ کی پائپ لائن سے 12,821 بیرل کروڈ آئل چوری کیا۔ انہوں نے ڈمپر گاڑی کے اندر خاص ٹینک تیار کیے تھے جنہیں بجری میں چھپا کر استعمال کیا جا رہا تھا۔ ملزمان نے مین آئل سپلائی لائن میں ٹیمپرنگ کرکے پریشر کنٹرول کیا اور زیرزمین کھدائی کے ذریعے دو بڑے ٹینک بنا رکھے تھے جن میں آئل ذخیرہ کیا جاتا تھا۔
چوری کی جگہ سے اسلحہ اور ایمونیشن بھی برآمد ہوا ہے۔ چوری شدہ تیل کی مالیت تقریباً 25 کروڑ 48 لاکھ روپے بتائی گئی ہے۔ مقدمے میں شرافت علی، محمد بلال، محمد واجد اور محمد ایوب کو نامزد کیا گیا ہے اور مزید تفتیش جاری ہے۔
تازہ ترین خبروں کے لیے پی این آئی کا فیس بک پیج فالو کریں
