وزارتِ مذہبی امور و بین المذاہب ہم آہنگی نے عمرہ سیزن 1447 ہجری کے لیے تصدیق شدہ عمرہ کمپنیوں کی فہرست جاری کر دی ہے۔
تفصیلات کے مطابق، وزارت نے ابتدائی طور پر ملک بھر سے 53 عمرہ آپریٹرز کے کوائف اور معاہدات کی جانچ مکمل کر کے انہیں اہل قرار دیا ہے۔ اس اقدام کا مقصد زائرین کو جعلسازی، دھوکہ دہی اور مالی نقصان سے محفوظ رکھنا ہے۔
ترجمان وزارت، محمد عمر بٹ کے مطابق تصدیق شدہ آپریٹرز کا تعلق کراچی، لاہور، اسلام آباد، راولپنڈی، پشاور اور دیگر شہروں سے ہے، جنہیں سخت جانچ پڑتال کے بعد فہرست میں شامل کیا گیا ہے۔
انہوں نے زائرین کو ہدایت کی کہ عمرہ پیکیجز کی بکنگ صرف انہی تصدیق شدہ کمپنیوں کے ذریعے کریں تاکہ کسی بھی قسم کے نقصان یا پریشانی سے بچا جا سکے۔ ترجمان نے یہ بھی واضح کیا کہ جاری کی گئی فہرست پورے ہجری سال 1447ھ کے لیے مؤثر ہے۔
وزارت نے دیگر عمرہ کمپنیوں کو بھی ہدایت دی ہے کہ وہ اپنی دستاویزات اور معاہدوں کو وزارت کے قواعد کے مطابق مکمل کریں۔ تصدیق شدہ کمپنیوں کی مکمل فہرست وزارت کی آفیشل ویب سائٹ پر عوام کے لیے جاری کر دی گئی ہے اور اسے پی ڈی ایف کی صورت میں بھی ڈاؤن لوڈ کیا جا سکتا ہے۔
سرکاری حج اسکیم 2026 کی تازہ ترین صورتحال
دوسری جانب وزارت مذہبی امور نے پیر کے روز اعلان کیا کہ حج اسکیم 2026 کے تحت اب تک ایک لاکھ 14 ہزار 500 سے زائد درخواستیں موصول ہو چکی ہیں، جبکہ محض ساڑھے 3 ہزار نشستیں باقی رہ گئی ہیں۔
ترجمان کے مطابق نامزد بینکوں کو ہدایت دی گئی ہے کہ وہ کوٹہ مکمل ہونے تک درخواستیں وصول کرتے رہیں۔ خواہشمند عازمین کو مشورہ دیا گیا ہے کہ وہ فوری طور پر قریبی نامزد بینک کی شاخ میں درخواست جمع کرائیں، کیونکہ جیسے ہی آخری نشست مکمل ہوگی، درخواستوں کا عمل بند کر دیا جائے گا۔
تازہ ترین خبروں کے لیے پی این آئی کا فیس بک پیج فالو کریں
