ملک میں کتنے مساجد، مدارس، دکانیں اور ہسپتال؟نتائج جاری

پاکستان کی پہلی اقتصادی شماری 2023 کے نتائج جاری کر دیے گئے ہیں۔ رپورٹ کے مطابق ملک میں 6 لاکھ 403 مساجد اور 36 ہزار 331 دینی مدارس موجود ہیں۔ تعلیمی اداروں کی کل تعداد 3 لاکھ 26 ہزار 868 ہے، جن میں 2 لاکھ 42 ہزار اسکول، 11 ہزار 568 کالجز اور 214 جامعات شامل ہیں۔

وفاقی ادارہ شماریات کے مطابق پاکستان میں ہوٹلوں کی تعداد اسپتالوں سے بھی زیادہ ہے۔ ملک میں 2 لاکھ 56 ہزار ہوٹل جبکہ ایک لاکھ 19 ہزار 789 اسپتال ہیں۔ انسانی صحت اور سماجی کاموں سے متعلق اداروں کی تعداد 1 لاکھ 23 ہزار 937 ہے۔ ہوسٹلز کی تعداد 16 ہزار 565 سے زائد ہے۔

رپورٹ کے مطابق ملک میں 70 لاکھ سے زائد کاروباری ادارے یا دکانیں کام کر رہی ہیں۔ ان میں سے 95 فیصد میں ملازمین کی تعداد 10 سے کم ہے۔ سب سے زیادہ ادارے ہول سیل اور ریٹیل سیکٹر میں ہیں جن کی تعداد 29 لاکھ ہے، جن میں 27 لاکھ پرچون فروش اور 1 لاکھ 88 ہزار ہول سیل دکانیں شامل ہیں۔

زراعت، جنگلات اور ماہی گیری سے متعلق اداروں کی تعداد 11 لاکھ ہے، جبکہ خدمات کے شعبے سے منسلک کاروباری ادارے 9 لاکھ 45 ہزار سے زیادہ ہیں۔ ملک میں سروس شاپس کی تعداد 8 لاکھ 25 ہزار ہے، پیداواری شاپس 6 لاکھ 43 ہزار اور مینوفیکچرنگ یونٹس 6 لاکھ 96 ہزار 558 ہیں۔ فیکٹریوں کی تعداد 23 ہزار بتائی گئی ہے۔

پاکستان میں سرکاری تنظیموں کی تعداد 29 ہزار 836 ہے۔ رپورٹ میں بتایا گیا ہے کہ یہ اعداد و شمار ملک میں منصوبہ بندی اور پالیسی سازی کے لیے اہم کردار ادا کریں گے۔