پاکستان تحریک انصاف (پی ٹی آئی) کے بانی عمران خان نے قومی اسمبلی اور سینیٹ میں قائد حزب اختلاف کے لیے نئے رہنماؤں کے نام فائنل کر دیے ہیں۔
تفصیلات کے مطابق قومی اسمبلی میں محمود خان اچکزئی کو اپوزیشن لیڈر نامزد کیا گیا ہے، جب کہ سینیٹ میں اعظم خان سواتی کو قائد حزب اختلاف کے طور پر آگے لایا گیا ہے۔
پی ٹی آئی کے سیکریٹری جنرل سلمان اکرم راجا نے اس فیصلے کی تصدیق کرتے ہوئے بتایا کہ یہ نام عمر ایوب اور شبلی فراز کی جگہ دیے گئے ہیں، جنہیں 5 اگست کو الیکشن کمیشن آف پاکستان (ای سی پی) نے دیگر 7 ارکان سمیت نااہل قرار دے دیا تھا۔
سلمان اکرم راجا نے مزید بتایا کہ ضمنی انتخابات میں حصہ لینے سے متعلق فیصلہ پی ٹی آئی کی سیاسی کمیٹی کرے گی، جس کا اجلاس آج طلب کر لیا گیا ہے تاکہ آئندہ کی حکمت عملی طے کی جا سکے۔
انہوں نے یہ بھی بتایا کہ پنجاب اسمبلی میں اپوزیشن لیڈر کے لیے 5 ناموں کی فہرست عمران خان کو بھجوا دی گئی ہے، جن میں سے حتمی انتخاب خود چیئرمین کریں گے۔
یہ فیصلے ایسے وقت میں سامنے آئے ہیں جب پارٹی کو قومی سطح پر نئی سیاسی صف بندی اور قیادت کی تشکیل کے چیلنجز درپیش ہیں۔
تازہ ترین خبروں کے لیے پی این آئی کا فیس بک پیج فالو کریں
