ماہر ماحولیات ڈاکٹر زینب نعیم نے اسلام آباد میں بونیر جیسے خطرناک سیلاب کا خدشہ ظاہر کرتے ہوئے خبردار کیا ہے کہ پہاڑوں پر بے تحاشا کرشنگ ہورہی ہے اور اس پر کوئی مؤثر چیک اینڈ بیلنس موجود نہیں۔ ان کے مطابق پہاڑوں کو توڑنے کے باعث بھاری پتھر سیلابی ریلوں کے ساتھ بہہ کر انسانی آبادیوں کو نقصان پہنچاتے ہیں۔
انہوں نے زور دیا کہ کراچی کے نالوں کی صفائی اور محکموں میں اہل افراد کی تعیناتی ناگزیر ہے جبکہ کلائمٹ چینج پر وزیرِاعظم کی سربراہی میں قومی سطح پر مکالمہ ہونا چاہیے۔ پروگرام میں شریک صوبائی وزیر ناصر شاہ نے کہا کہ کراچی کے نالوں کی نکاسی کی گنجائش صرف 40 ملی میٹر ہے، اس لیے جب 200 ملی میٹر بارش ہوتی ہے تو شہر میں بدترین صورتحال پیدا ہونا لازمی ہے۔
وفاقی وزیر برائے موسمیاتی تبدیلی ڈاکٹر مصدق ملک نے خبردار کیا کہ بارشوں کا موجودہ سلسلہ 10 ستمبر تک جاری رہے گا جبکہ اگلا مون سون اور بھی زیادہ شدت والا ہوگا، جو 15 دن پہلے شروع ہوسکتا ہے۔ ان کا کہنا تھا کہ اگلے مون سون کی تیاری آج سے ہی شروع ہونی چاہیے۔
تازہ ترین خبروں کے لیے پی این آئی کا فیس بک پیج فالو کریں
