بارشوں اور سیلاب سے ملک بھر میں ہلاکتیں اور تباہی، نقصان کا ڈیٹا جاری

نیشنل ڈیزاسٹر مینجمنٹ اتھارٹی (این ڈی ایم اے) نے گزشتہ 24 گھنٹوں کے دوران بارشوں اور سیلاب سے ہونے والے جانی نقصان کی تفصیلات جاری کی ہیں۔

ترجمان این ڈی ایم اے کے مطابق ملک بھر میں بارشوں کے باعث 41 افراد جاں بحق اور 11 زخمی ہوئے۔ جاں بحق ہونے والوں میں 29 مرد، 9 خواتین اور 3 بچے شامل ہیں۔

اعداد و شمار کے مطابق:

خیبر پختونخوا میں 19 اموات اور 1 زخمی،

گلگت بلتستان میں 11 اموات اور 5 زخمی،

سندھ میں 11 اموات اور 5 زخمی رپورٹ ہوئے۔

مجموعی نقصان (مون سون سیزن کے دوران)

این ڈی ایم اے کے مطابق مون سون بارشوں کے آغاز سے اب تک ملک بھر میں 748 افراد جاں بحق اور 978 زخمی ہو چکے ہیں۔ جاں بحق افراد میں 459 مرد، 111 خواتین اور 178 بچے شامل ہیں جبکہ زخمیوں میں 475 مرد، 243 خواتین اور 260 بچے شامل ہیں۔

مزید اعداد و شمار کے مطابق:

پنجاب میں 165،

خیبر پختونخوا میں 446،

سندھ میں 40،

گلگت بلتستان میں 45،

آزاد کشمیر میں 22،

اسلام آباد میں 8 افراد جاں بحق ہوئے۔

ملک بھر میں اب تک 990 مکانات منہدم جبکہ 3 ہزار 898 مویشی ہلاک ہو چکے ہیں۔

کے پی میں نقصانات (پی ڈی ایم اے رپورٹ)

دوسری جانب پرونشل ڈیزاسٹر مینجمنٹ اتھارٹی (پی ڈی ایم اے) نے خیبرپختونخوا میں کلاؤڈ برسٹ، بارشوں اور سیلاب سے ہونے والے نقصانات کا ڈیٹا جاری کیا ہے۔

رپورٹ کے مطابق صوبے میں:

377 افراد جاں بحق اور 182 زخمی ہوئے،

1377 گھروں کو نقصان پہنچا، جن میں 1022 جزوی اور 355 مکمل تباہ ہوئے۔

سب سے زیادہ جانی نقصان بونیر میں رپورٹ ہوا جہاں کلاؤڈ برسٹ اور سیلاب کے باعث 228 افراد جاں بحق ہوئے۔ اس کے علاوہ صوابی، باجوڑ، مانسہرہ، شانگلہ، دیر لوئر اور بٹگرام میں بھی شدید حادثات پیش آئے۔