اسلام آباد میں سپریم کورٹ کے باہر میڈیا سے گفتگو کرتے ہوئے بانی پی ٹی آئی کی بہن علیمہ خان نے کہا کہ آج 9 مئی کیسز کی سماعت کل تک ملتوی کردی گئی ہے۔ ان کا کہنا تھا کہ ہماری کوشش تھی کہ ہائیکورٹ میں ہمارے کیسز بھی مقرر ہوں۔
علیمہ خان نے مزید بتایا کہ بانی پی ٹی آئی نے واضح کر دیا ہے کہ حقیقی آزادی تک تحریک جاری رہے گی اور ضمنی انتخابات میں حصہ نہیں لیا جائے گا۔ دوسری جانب راولپنڈی کی انسداد دہشت گردی عدالت میں 26 نومبر احتجاج کیس کی سماعت ہوئی۔ اے ٹی سی کے جج امجد علی شاہ نے مقدمے کی سماعت کے بعد 4 ملزمان کو 4،4 ماہ قید کی سزا سنا دی۔
پراسیکیوٹر ظہیر شاہ اور ملزمان کے وکلاء عدالت میں پیش ہوئے جبکہ ملزمان نے اپنے اقبالی بیانات جمع کراتے ہوئے کہا کہ وہ لیڈرشپ کے اکسانے پر پرتشدد احتجاج میں شریک ہوئے تھے۔ انہوں نے عدالت کو بتایا کہ وہ غریب مزدور ہیں، لہٰذا سزاؤں میں نرمی کی جائے۔ ملزمان کے خلاف تھانہ انجرا ضلع اٹک میں جلاؤ گھیراؤ کا مقدمہ درج تھا۔
تازہ ترین خبروں کے لیے پی این آئی کا فیس بک پیج فالو کریں
