محکمہ موسمیات کی جانب سے شہرِ قائد میں بارشوں کی پیشگوئی کے پیشِ نظر میئر کراچی نے رین ایمرجنسی ڈیوٹی پر مامور ملازمین کی چھٹیاں منسوخ کردی ہیں۔
میئر کراچی مرتضیٰ وہاب کے مطابق بارشوں کی پیشگوئی کے تناظر میں کسی بھی ہنگامی صورتحال سے نمٹنے کیلئے بلدیہ عظمیٰ کراچی، واٹر کارپوریشن، سندھ سالڈ ویسٹ منیجمنٹ بورڈ اور ضلعی انتظامیہ سمیت تمام ادارے متحرک ہیں، نشیبی علاقوں میں ڈی واٹرنگ پمپس سے نکاسی کا عمل کیا جائے گا۔
میئر کراچی نے کہا کہ رین ایمرجنسی ڈیوٹی پر مامور ملازمین کی چھٹیاں منسوخ کردی گئی ہی۔ انہوں نے بتایا کہ انڈر پاسز کی نکاسی کے نظام کو بھی درست حالت میں رکھا ہوا ہے، برساتی نالوں کی صفائی کا کام مون سون کے اختتام تک جاری رہے گا، اب تک 30 لاکھ 24 ہزار کیوبک فٹ کچرا نالوں سے نکالا جاچکا ہے۔
واضح رہے کہ محکمہ موسمیات نے دن کے اوقات میں آج گرج چمک کے ساتھ بارش کی پیشگوئی کی ہے، کہا کہ بارش کا سلسلہ 22 اگست تک وقفے وقفے سے جاری رہے گا، مون سون کے اس سسٹم کےتحت کہیں ہلکی تو کہیں تیزبارش ہوسکتی ہے۔
تازہ ترین خبروں کے لیے پی این آئی کا فیس بک پیج فالو کریں
