تاجر رہنما ایس ایم تنویر نے کہا ہے کہ بھارت چین سے نہیں بیٹھے گا، اس لیے دشمن سے نمٹنے کے لیے پاکستان کو لازمی طور پر معیشت کو مضبوط کرنا ہوگا۔
ایف پی سی سی آئی میں نیوز کانفرنس کرتے ہوئے ان کا کہنا تھا کہ قیمتی معدنیات ہونے کے باوجود قرضوں پر انحصار شرمناک ہے۔ انہوں نے واضح کیا کہ تاجر برادری کا تعلق سیاست سے نہیں بلکہ صرف معیشت سے ہے، ان کا کردار مسائل کی نشاندہی کرنا ہے جبکہ حل نکالنا حکومت کی ذمہ داری ہے۔ ایس ایم تنویر نے کہا کہ تاجر اٹھارہویں ترمیم کے خلاف نہیں ہیں بلکہ اس پر مکمل عمل درآمد چاہتے ہیں۔ ان کے مطابق تاجروں کی کوشش سے بجلی کا نرخ 48 روپے سے کم ہو کر 31 روپے فی یونٹ تک آ گیا ہے اور ہدف 26 روپے فی یونٹ لانا ہے۔ شرح سود 6 فیصد کرنے سے حکومت کو ساڑھے 3 ہزار ارب روپے سود کی بچت ہوگی۔
انہوں نے تجویز دی کہ ڈویژن اور ضلع کی سطح پر جا کر معیشت کو منظم کرنا ہوگا، تاہم کسی کمشنر کے لیے ممکن نہیں کہ وہ اپنی ڈویژن کی مکمل اونرشپ لے سکے کیونکہ چھ ماہ بعد اس کا تبادلہ ہو جاتا ہے۔
تازہ ترین خبروں کے لیے پی این آئی کا فیس بک پیج فالو کریں
