اسلام آباد: 14 اگست کے موقع پر ایوانِ صدر میں منعقدہ پروقار تقریب میں صدرِ مملکت آصف علی زرداری نے مختلف سول و عسکری شخصیات کو اعلیٰ اعزازات سے نوازا۔
ذرائع کے مطابق سول و ملٹری ایوارڈز کمیٹی نے وزیراعظم شہباز شریف کا نام بھی “نشانِ پاکستان” کے لیے تجویز کیا تھا تاہم وزیراعظم نے سمری موصول ہونے پر اپنا نام فہرست سے نکال دیا اور باقی تمام ناموں کی منظوری دی۔ دوسری جانب سینئر صحافی و ایڈیٹر انویسٹی گیشن دی نیوز انصار عباسی نے بھی “معرکہ حق ایوارڈ” وصول کرنے سے معذرت کرلی۔ انہوں نے سیکریٹری کابینہ کو آگاہ کرتے ہوئے کہا کہ یہ ایوارڈ پوری قوم کا حق ہے کیونکہ انہوں نے کوئی غیر معمولی کام نہیں کیا بلکہ صرف اپنا فرض ادا کیا۔
تقریب کے دوران صدرِ مملکت نے وزیر خارجہ اسحاق ڈار، پارلیمانی کمیٹی کے سربراہ بلاول بھٹو زرداری، وزیر قانون اعظم نذیر تارڑ، وزیر دفاع خواجہ آصف اور وزیراعظم کے مشیر رانا ثنا اللہ کو “نشانِ امتیاز” سے نوازا۔ اس کے علاوہ وزیر اطلاعات عطا اللہ تارڑ، وزیر داخلہ محسن نقوی، احسن اقبال، شیری رحمان، فیصل سبزواری، مصدق ملک اور حنا ربانی کھر سمیت طارق فاطمی اور خرم دستگیر خان کو بھی سول اعزازات دیے گئے۔ فوجی قیادت میں فیلڈ مارشل اور آرمی چیف عاصم منیر کو بھارت کے خلاف “معرکہ حق” میں فرنٹ لائن قیادت اور بہترین جنگی حکمت عملی پر “ہلالِ جرات” جبکہ ائیر چیف مارشل ظہیر بابر احمد سدھو کو “ہلالِ امتیاز” سے نوازا گیا۔
تازہ ترین خبروں کے لیے پی این آئی کا فیس بک پیج فالو کریں
