نائب وزیرِاعظم اسحاق ڈار نے جشنِ آزادی کے موقع پر پوری قوم کو دلی مبارکباد پیش کرتے ہوئے پاکستان زندہ باد کا نعرہ بلند کیا اور کہا کہ ہمارے آبا و اجداد کی عظیم قربانیوں سے پاکستان وجود میں آیا، جس پر انہیں خراجِ عقیدت پیش کرنا ہمارا فرض ہے۔
انہوں نے اپنے پیغام میں کہا کہ جب تک ہم “لا الہٰ الا اللّٰہ، محمد رسول اللّٰہ” کے پرچم تلے متحد ہیں، کوئی طاقت ہمیں شکست نہیں دے سکتی۔ آزادی کے تحفظ کے لیے سرحدوں کا دفاع، سچائی، انصاف اور وقار کے اصولوں کو برقرار رکھنا لازم ہے۔ وزیرِ خارجہ کی حیثیت سے انہوں نے کہا کہ پاکستان کی خارجہ پالیسی دنیا کے سامنے ہمیں ایک ذمہ دار اور امن پسند ملک کے طور پر پیش کرتی ہے، جو شراکت داری اور مکالمے کے ذریعے تنازعات کے حل میں کردار ادا کر رہی ہے۔
اسحاق ڈار نے ہر شہری سے اپیل کی کہ وہ متحد رہیں، جمہوری اقدار کی حفاظت کریں اور ایک مضبوط، باوقار اور خوشحال پاکستان کی تعمیر میں اپنا کردار ادا کریں۔ انہوں نے مسلح افواج اور عوام کے اُس عزم کو سراہا جس نے ملک کی خودمختاری کا دفاع کیا۔ اپنے پیغام کے اختتام پر اسحاق ڈار نے کہا کہ پاکستان باہمی احترام، علاقائی سکون اور امن پر مبنی سفارتکاری کے عزم پر قائم ہے۔ آج ہم یہ عہد دہراتے ہیں کہ پاکستان کے عالمی وقار کو مزید بلند کریں گے، اپنے اسٹریٹجک اور معاشی مفادات کو آگے بڑھائیں گے اور پُرامن ہمسائیگی کو فروغ دیں گے۔
تازہ ترین خبروں کے لیے پی این آئی کا فیس بک پیج فالو کریں
