اہم پی ٹی آئی رہنما بری، بُری خبر بھی آ گئی

انسداد دہشت گردی کی عدالت نے 9 مئی کے دو مقدمات کا فیصلہ سنا دیا، جس کے تحت شاہ محمود قریشی کو الزامات سے بری کر دیا گیا جبکہ یاسمین راشد، اعجاز چوہدری اور محمود الرشید سمیت کئی ملزمان کو 10،10 سال قید کی سزا سنائی گئی۔

عدالتی فیصلے کا اعلان کوٹ لکھپت جیل میں کیا گیا، جہاں مقدمات کی سماعت مکمل ہونے کے بعد فیصلہ محفوظ کیا گیا تھا۔

فیصلے کے مطابق، ڈاکٹر یاسمین راشد، اعجاز چوہدری، عمر سرفراز چیمہ اور محمود الرشید کو 10 سال قید کی سزا سنائی گئی۔ اسی مقدمے میں عائشہ بھٹہ کو جناح ہاؤس کے قریب گاڑیاں جلانے کے الزام میں 10 سال قید کی سزا دی گئی۔

دوسری جانب، تھانہ شادمان کو آگ لگانے سے متعلق کیس میں عدالت نے 12 افراد کو شک کا فائدہ دیتے ہوئے بری کر دیا، جن میں سہیل خان، اویس، رفیع الدین، فرید خان، سلمان احمد، عبدالقادر، فیضان، طیب، سلطان، شاہد بیگ، ماجد علی اور بخت روان شامل ہیں۔

عدالت نے تحریک انصاف کی رہنما عالیہ حمزہ ملک اور صنم جاوید کو بھی 5،5 سال قید کی سزا سنائی۔

واضح رہے کہ چند روز قبل بھی انسداد دہشت گردی کی عدالت نے 9 مئی کے جلاؤ گھیراؤ کیسز میں عمر ایوب، شبلی فراز اور دیگر افراد کو سزائیں سنائی تھیں۔