سونے کا لوٹا پیتل میں بدل کر توشہ خانہ جمع کرایا، فیاض الحسن چوہان

پاکستان تحریک انصاف کے سابق رہنما اور عمران خان کے سابق میڈیا ایڈوائزر فیاض الحسن چوہان نے دعویٰ کیا ہے کہ کرتار پور راہداری کے افتتاح کے موقع پر سابق وزیراعظم کو سکھ برادری کی جانب سے ملنے والا سونے کا لوٹا پیتل کے لوٹے سے بدل دیا گیا۔

ایک انٹرویو میں فیاض الحسن چوہان نے بتایا کہ جنوری یا فروری 2019 میں کرتار پور راہداری کے افتتاح پر جنرل (ر) قمر جاوید باجوہ اور اس وقت کے وزیراعظم عمران خان موجود تھے۔ اس موقع پر سکھ برادری نے عمران خان کو بطور تحفہ سونے کا لوٹا پیش کیا، تاہم بعد میں اسے راولپنڈی کے صرافہ بازار سے پیتل کے لوٹے میں تبدیل کروا کر اس پر سونے کی قلعی چڑھائی گئی اور توشہ خانہ میں جمع کرا دیا گیا، جبکہ اصل لوٹا اپنے پاس رکھ لیا گیا۔

انہوں نے عمران خان اور ان کی اہلیہ بشریٰ بی بی کا نام لیے بغیر انہیں “لالچی، حریص اور نوسرباز” قرار دیتے ہوئے مزید الزام لگایا کہ ملائیشیا سے ملنے والا ایک قیمتی ڈنر سیٹ بھی راولپنڈی کے راجا بازار میں بیچ دیا گیا۔ فیاض الحسن چوہان نے کہا کہ وہ سابق وزیراعظم کو آج “لوٹا چور” کا لقب دیتے ہیں اور الزام عائد کیا کہ وہ ذاتی مفاد کے لیے پاکستان کی عزت، وقار اور مستقبل کو نقصان پہنچا رہے ہیں۔ یاد رہے کہ فیاض الحسن چوہان کو 2022 میں عمران خان نے اپنا میڈیا ایڈوائزر مقرر کیا تھا۔