راولپنڈی: تحریکِ انصاف کے بانی کی ہمشیرہ علیمہ خان نے انکشاف کیا ہے کہ پارٹی کی اگلی بڑی سیاسی تحریک 14 اگست سے شروع کی جائے گی۔ انہوں نے کہا کہ بانیٔ پی ٹی آئی نے 5 اگست اور 14 اگست کو اہم قرار دیا ہے۔
اڈیالہ جیل کے باہر میڈیا سے گفتگو کرتے ہوئے علیمہ خان نے کہا کہ بانیٔ پی ٹی آئی کا کہنا ہے کہ عوام کا الیکشن میں مینڈیٹ چوری کیا گیا، میڈیا کو خاموش کرا دیا گیا اور عدلیہ کو حکومتی اثر و رسوخ کے تحت لایا گیا ہے۔ انہوں نے مزید کہا کہ پیپلز پارٹی اور ن لیگ آج مشرف دور کی ق لیگ جیسا کردار ادا کر رہی ہیں، جب کہ افغانستان کے ساتھ تعلقات میں دوری نہیں ہونی چاہیے، یہ بانیٔ تحریکِ انصاف کا مؤقف ہے۔
علیمہ خان کے مطابق پارٹی کے ارکان اسمبلی کو ناجائز طور پر نااہل کیا گیا ہے اور ان سیٹوں پر تحریک انصاف الیکشن کا بائیکاٹ کرے گی۔ انہوں نے بتایا کہ بانیٔ پی ٹی آئی کے بچوں نے نائیکوپ اور ویزے کے لیے درخواست دی ہے، لیکن حکومت نہیں چاہتی کہ وہ پاکستان آئیں۔ ان کا کہنا تھا کہ اگر بچوں کو اجازت ملی تو 5 اگست کو وہ بھی اڈیالہ آئیں گے، ملاقات کی درخواست دی گئی ہے، اجازت ملی تو ملاقات ہوگی۔
تازہ ترین خبروں کے لیے پی این آئی کا فیس بک پیج فالو کریں
